Bilindiyi kimi, yığmamız mayın 30-dək Bakıda, iyunun 1-dən 10-dək isə Avstriyanın Bad-Valtersdorf şəhərində təlim-məşq toplanışında olacaq. Kollektiv Avstriya toplanışı çərçivəsində iyunun 5-də Malta, 9-da isə San Marino yığmasına qarşı iki yoldaşlıq oyunu keçirəcək. Macarıstanın Sombatxey şəhərində yerləşən “Haladaş” stadionunda keçiriləcək hər iki görüş Bakı vaxtıyla saat 22.00-da başlayacaq.

Ayxan Abbasov mayın 23-də milliyə dəvət olunan 28 futbolçunun adını açıqladı. Təbii ki, bu dəfə də bəzilərinin yığmaya çağrılması birmənalı qarşılanmadı. Əlbəttə, bir çox futbolçunun formada olmasa da, təcrübəsi sayəsində millidə olmaq şansı qazandığı göz önündədi və baş məşqçi də bu məsələni dəfələrlə etiraf edib. Ancaq bir neçə oyunçu var ki, onların çağrılmasına haqq qazandırmaq çətindi.

Söhbət Mahir Emreli, Elvin Cəfərquliyev, Renat Dadaşov və Nəriman Axundzadədən gedir.

Mahir mövsüm ərzində 2-ci bundesliqada cəmi 336 dəqiqə forma geyib. Ümumiyyətlə, onun son üç aydakı statistikası biabırçıdı. Belə ki, hücumçu fevralın 22-dən bəri cəmi 143 dəqiqə tər töküb. Elvin Cəfərquliyev isə sonuncu dəfə aprelin 11-də premyer-liqada meydana çıxıb. Düzdü, o, əvəzedicilər liqasında şans qazanıb. Lakin müdafiəçinin intizamsızlıq üzündən əsas heyətdən uzaqlaşdırıldığını nəzərə alsaq, millidəki varlığı anlaşılan deyil. Renata gəlincə, o, Polşa “Motor”unun əsas heyətində möhkəmlənməkdə ciddi çətinliklə üzləşib. İş o həddə çatıb ki, klub onunla yolları ayırdığını açıqlayıb. Hücumçu mövsüm ərzində çempionatda cəmi 451 dəqiqə forma geyib. Futbolçu “Motor”un son 9 oyununda 37 dəqiqə şans qazana bilib. Nərimanla bağlı durum isə daha kritikdi. “Kolambus Kryu”nun (ABŞ) şərəfini qoruyan gənc hücumçu hələ start heyətində yer almayıb. 6 matçda meydana çıxan oyunçu ən yaxşı halda 11 dəqiqə tər töküb. Ona yalnız kubok oyunlarında şans verilib ki, rəqiblər aşağı liqa təmsilçisi olub.

İndi, deyin görək, klublarında şans qazanmayan futbolçuların millidə karyerasının davam etdirilməsi onlar üçün motivasiyadı, yoxsa ən böyük pislik? Həqiqətənmi yığma üçün quru ad yetərlidi?

KƏNAN BAHADIR