Növbəti mövsümdən premyer-liqaya qayıdan iki komandadan biri "Turan Tovuz"du. Uzun müddət komandanın yeni baş məşqçisinin kim olacağı gündəmdə idi. Bu posta Yunis Hüseynov, Əsgər Abdullayev, Ramin Quliyev, Ramiz Məmmədov və Ayxan Abbasov namizəd sayılsa da, klubun Müşahidə Şurasının iclasında Ayxan Abbasovun üzərində dayanıldı.

“Turan Tovuz”un baş məşqçisi ola bilməyənlərin fikirlərini öyrənməyi lazım bildik. Görəsən, bunun səbəbini nədə görürlər? Təəssüf ki, onlardan yalnız ikisi ilə əlaqə saxlaya bildik.

Yunis Hüseynov :
"Həqiqətə qalsa, ən başdan "Turan Tovuz"un baş məşqçi postuna yeganə namizəd mən idim. Klub mənimlə danışıqlar aparırdı. Müşahidə Şurasının sədri Oqtay Abdullayevlə söhbətlərimiz zamanı ikinci namizəd kimi Əsgər Abdullayevlə də danışıqlar aparıldığını öyrəndim. Sonradan digər namizədlərin adları əlavə olundu. Çox uzun danışmaq istəmirəm. Gənc həmkarım Ayxan Abbasova işində uğurlar arzulayıram. Hələ qocalmamışam, gələcəkdə də baş məşqçi ola bilərəm".

Ramiz Məmmədov :
"Əslində mənə "Turan Tovuz" rəhbərliyindən baş məşqçi olmaq barədə rəsmi təklif gəlməmişdi. Bildiyim qədər klubun Müşahidə Şurasında bu posta namizədlərdən biri kimi irəli sürülmüşəm. İstənilən halda, adımı çəkib yad etdikləri üçün təşəkkürümü bildirirəm. Ayxan Abbasova və "Turan Tovuz"a uğurlar arzulayıram".

ABDULLA İSMAYILOĞLU