“Neftçi” sanki qara qüvvələrin caynağında qalıb.

Klub yenə problemlə üzləşib. Belə ki, FİFA "Esperans"a transfer qadağası qoyub. Buna səbəb isə Tunis klubunun "Neftçi"dən heyətinə qatdığı Sabir Buqrin üçün ödəniş etməməsidi. Qərara əsasən, "Esperans” növbəti üç “transfer pəncərəsi”ndə heyətinə yeni futbolçu qata bilməyəcək. Klub 827 min manat təzminatı ödədikdən sonra qadağa aradan götürülə bilər. Buqrin bu ilin yanvarında "Neftçi"dən "Esperans"a keçib.

Görəsən, nə baş verib ki, Azərbaycan klubu FİFA-ya müraciət edib? “Esperans” hansı öhdəlikləri yerinə yetirməyib? Suallarımızı “Neftçi”nin Media, Marketinq və İctimaiyyətlə Əlaqələr Departamentinin rəhbəri belə cavabladı: “Sabir Buqrin məsələsində qəliz nəsə yoxdu. Qarşı tərəfin bizə borcu var. Onlar ödənişi gecikdirdilər. Son müddət ötdüyü üçün FIFA-ya şikayət etdik. Ali futbol qurumunun bununla bağlı qərarı çıxıb. Qərarla da bütün ictimaiyyət tanışdı”.

“Neftçi” adına müsbət məqam stadionla bağlıdı. “Bakcell Arena” yeni mövsümə hazırdı. Bu məlumatı da qəzetmizə açıqlamasında Rüstəm Allahverdiyev verdi. Onun sözlərinə görə, flaqman “Aris”lə ev oyununu adı çəkilən arenada keçirəcək.

İLKİN SULTANLI