Çempionatın sonu yaxınlaşdıqca premyer-liqada gərginlik yüksəlir.

Düzdü, ilk “üçlük” artıq məlumdu. Ancaq Avropaya yollanan vaqonun dördüncü sərnişinin adı hələ məlum deyil. Bu bilet uğrunda “Zirə” ilə “Qəbələ” arasında qızğın mübarizə gedir. Elə turnir cədvəlinin aşağı pilləsi də qaynar qazanı xatırladır. “Turan Tovuz”dan başqa, qalan 4 klub elitada qalmaq uğrunda tər tökür.

Belə həssas məqamda yığmanın baş məşqçisi Canni de Byazi gözə dəymir. Bakıda olduğu müddətdə çempionatın əksər oyunlarını tribundan canlı izləyən italyan mütəxəssisi son turda heç bir stadionda görmədik. Nə baş verib? De Byazi niyə görünmür?

Etibarlı mənbədən “Football-plus.az”a daxil olan məlumat italyanın qeybə çəkilməsinin səbəbini aşkara çıxardı. Sən demə, yığmanın çalışdırcısı bu günlərdə yenidən İtaliyaya yollanıb. Martın sonunda qayınatasının dəfnində iştirak etmək üçün Bakını tərk edən De Byazi bu dəfə xeyir işlə bağlı vətəninə baş çəkib. Mənbəmizin sözlərinə görə, 66 yaşlı mütəxəssis bacısıoğlunun toyunda iştirak etmək üçün Apennin yarımadasına yollanıb. Mənbəmiz onu da bildirdi ki, millinin baş məşqçisi dünən gecə saatlarında Bakıya qayıdıb.

RƏŞAD