Bu gün Misli premyer-liqasında 32-ci tura start veriləcək.

Bilindiyi kimi, artıq çempion, ölkəmizin avrokuboklardakı iki təmsilçisi, premyer-liqanı tərk edəcək və burda yerini qorumaq üçün pley-off oyunu keçirəcək komandalar bəllidi. Yalnız bir sual cavabını gözləyir: Konfrans Liqasına “Neftçi”, yoxsa “Zirə” qatılacaq?

Misli premyer-liqası
3-cü dövrə, 32-ci tur
15 may
Karvan Yevlax – Qəbələ
“Karvan-Yevlax”ın bu rəqiblə ev oyununun balansı: 1:+0=1-0, 1:1.
2025/26 – 1:1.
Cəzalılar: Emin Rüstəmov (Karvan-Yevlax), Nuğay Rəşidov, Asif Məmmədov (hər ikisi “Qəbələ”).
“Futbol+”in proqnozu: 20-50-30.
Hakimlər: ƏLİ ƏLİYEV, Gülnurə Əkbərzadə, Mirnihad Seyidov, Vüqar Həsənli.
VAR hakimi: Rauf Cabbarov.
VAR hakiminin köməkçisi: Cəmil Quliyev.
Hakim-inspektor: Anar Salmanov.
AFFA nümayəndəsi: Elçin Mehtiyev.
Yevlax, şəhər stadionu. Saat 17.00.

Düzü, bu oyunla bağlı danışılacaq çox söz yoxdu. “Karvan-Yevlax” premyer-liqanı tərk edəcək. “Qəbələ” isə böyük ehtimalla “Səbail”ə qalib gəlməyə çalışacaq ki, elitadakı yerini qorusun. Matç yalnız mövsümlük göstəricilərin yaxşılaşdırılmasına xidmət edə bilər ki, bu yöndə “Qəbələ”ni daha şanslı saya bilərik. İş ondadı ki, komandaların indiyəqədərki iki qarşılaşmasında qalib müəyyənləşməyib. Topların nisbəti belədi– 2:2.

Araz-Naxçıvan – Kəpəz
“Araz-Naxçıvan”ın bu rəqiblə ev oyunlarının balansı: 7:+3=1-3, 7:6.
2000/01 – 1:3; 2001/02 – 2:0; 20223/24 – 0:1, 1:2; 2024/25 – 1:0, 0:0; 2025/26 – 2:0.
Cəzalı: yoxdu.
“Futbol+”in proqnozu: 40-30-30.
Hakimlər: RƏŞAD ƏHMƏDOV, Rahil Ramazanov, Orxan İbişov, İslam Məmmədov.
VAR hakimi: Əkbər Əhmədov.
VAR hakiminin köməkçisi: Tural Qurbanov.
Hakim-inspektor: Munis Abdullayev.
AFFA nümayəndəsi: Elgiz Abbasov.
Sumqayıt, “SOCAR Polymer Arena”. Saat 19.30.

Avrokuboklara vəsiqədən əlini üzən “Araz-Naxçıvan” “Sumqayıt”a uduzmaqla daha bir pillə gerilədi. Komanda bu matçda qalib gəlməklə mövsümü bir qədər yuxarı sırada bitirmək şansını artırmağa cəhd göstərəcək. “Kəpəz” bayram əhval-ruhiyyəsindədi. Premyer-liqadakı ömrünü azı bir il də uzadan “sari-göylər” arxayınlığın qurbanı olmasa, maraqlı qarşılaşmanın şahidi ola bilərik.

Komandalar indiyə qədər 14 dəfə üz-üzə gəlib. Hərəyə 6 qələbə qazanan tərəflər 2 dəfə “sülh”ə razı olublar. Topların nisbətində “sarı-göylər” öndədi – 20:15.

16 may
Şamaxı – Turan Tovuz
“Şamaxı”nın bu rəqiblə ev oyunlarının balansı: 5:+0=2-3, 2:5.
2022/23 – 0:1, 0:1; 2024/25 – 2:2, 0:1; 2025/26 – 0:0.
Cəzalı: yoxdu.
“Futbol+”in proqnozu: 20-40-40.
Hakimlər: RUSLAN QULİYEV, Eyyub İbrahimov, Teymur Teymurov, Rəvan Həmzəzadə.
VAR hakimi: Kamranbəy Rəhimov.
VAR hakiminin köməkçisi: Zeynal Zeynalov.
Hakim-inspektor: Rəhim Həsənov.
AFFA nümayəndəsi: Emin Cəfərov.
Şamaxı, şəhər stadionu. Saat 17.00.

Mövsüm üçün hədəfinə çatan komandaların duelinin baxımlı keçəcəyi yönündə gözləntilər var. Bəli, favorit qonaqlardı, lakin meydan sahibləri də çətin rəqiblərlə mübarizədə pis təsir bağışlamayıb. İndi “şirlər” elitada yerini qoruyubsa, “bozqurd” avrokuboklara vəsiqəni təmin edib. Düzdü, inandırıcı görünmür, amma “Qarabağ” son iki turda uduzsa, tovuzlular Avropa Liqasına yollanacaq. Hər halda, “Şamaxı” azarkeşləri önündə uduzmamağa, “Turan Tovuz” şansını sınamağa çalışacaq.

Komandalar indiyə qədər 10 dəfə üz-üzə gəlib. Bunların 1-də “şirlər”, 5-də “bozqurd” qələbə qazanıb, 4-də qalib müəyyənləşməyib. Topların nisbətində tovuzlular öndədi – 13:10.

Qarabağ – İmişli
“Qarabağ”ın bu rəqiblə ev oyununun balansı: 1:+1=0-0, 2:0.
2025/26 – 2:0.
Cəzalı: yoxdu.
“Futbol+”in proqnozu: 50-30-20.
Hakimlər: EMİN ƏLİYEV, Asiman Əzizli, Rəhman İmami, Nicat İsmayıllı.
VAR hakimi: Əliyar Ağayev.
VAR hakiminin köməkçisi: Şirmamed Mamedov.
Hakim-inspektor: Ömər Paşayev.
AFFA nümayəndəsi: Elçin Məmmədov.
Bakı, Tofiq Bəhramov adına Respublika stadionu. Saat 17.00.

“Sabah”ın “qızıl dubl”u sayəsində Avropa Liqasının biraddımlığına gələn “Qarabağ” mövqeyini itirmək istəməz. Odu ki, “köhlən atlar”ın “İmişli”yə çətin anlar yaşadacağı dəqiqdi. Onsuz da Aran təmsilçisi mövsüm ərzində ağdamlıların öhdəsindən gələ bilməyib. “Pələnglər”in premyer-liqadakı yerini qoruduğunu da nəzərə alsaq, “Qarabağ”ın istəyinə çatacağını proqnozlaşdıra bilərik. Komandaların indiyəqədərki hər iki matçı “köhlən atlar”ın qələbəsiylə bitib. Topların nisbəti belədi – 3:0.

17 may
Zirə – Sumqayıt
“Zirə”nin bu rəqiblə ev oyunlarının balansı: 20:+13=6-1, 32:13.
2015/16 - 3:2, 1:0; 2016/17 - 0:1, 1:0; 2017/18 - 3:1, 1:1; 2018/19 - 3:1, 2:0; 2019/20 - 2:2; 2020/21 - 2:2, 0:0; 2021/22 - 1:0, 1:0; 2022/23 - 0:0, 3:1; 2023/24 - 1:0, 0:0; 2024/25 – 4:1, 3:1; 2025/26 – 1:0.
Cəzalı: yoxdu.
“Futbol+”in proqnozu: 40-30-30.
Hakimlər: CAVİD CƏLİLOV, Kamran Bayramov, Müslüm Əliyev, Kamran Əliyev.
VAR hakimi: İnqilab Məmmədov.
VAR hakiminin köməkçisi: Zöhrab Abbasov.
Hakim-inspektor: Zöhrab Qədiyev.
AFFA nümayəndəsi: Rüfət Əmirov.
Zirə, İdman Kompleksinin stadionu. Saat 18.00.

Kubokun finalında “Sabah”a uduzan “Zirə” premyer-liqa yoluyla Konfrans Liqasına vəsiqə qazanmaq uğrunda mübarizəni davam etdirəcək. İş ondadı ki, “qartallar”ın taleyi öz əlində deyil. Hətta bu tur “Neftçi” “Sasbah”a uduzsa belə, qəsəbə təmsilçisi 4-cü pilləyə yüksələ bilməyəcək. Yenə də sona qədər döyüşmək lazımdı. Heç şübhəsiz, “qartallar” bunu dərk edir. “Sumqayıt” üçün isə iş bitib. “Kimyaçılar” yalnız formalarının xatirinə müsbət nəticə əldə etmək üçün vuruşmalıdı.

Komandalar indiyə qədər 41 dəfə üz-üzə gəlib. Bunların 24-də “Zirə”, 6-də “Sumqayıt” qalib gəlib, 11-də hərəyə bir xal düşüb. Topların nisbətində “qartallar” öndədi – 60:26.

Sabah – Neftçi
“Sabah”ın bu rəqiblə ev oyunlarının balansı: 14:+4=4-6, 13:16.
2018/19 – 1:2, 0:2; 2019/20 – 0:2; 2020/21 – 0:2, 2:2; 2021/22 – 1:2, 0:1; 2022/23 – 2:1, 2:0; 2023/24 – 1:1, 0:0; 2024/25 - 0:0, 1:0; 2025/26 – 2:0.
Cəzalılar: İqor Noqeyra (Sabah), Luis Ortis (Neftçi).
“Futbol+”in proqnozu: 40-30-30.
Hakimlər: KAMAL UMUDLU, Namik Hüseynov, Vüsal Məmmədov, Elvin Bayramov.
VAR hakimi: Fərid Hacıyev.
VAR hakiminin köməkçisi: Akif Əmirəli.
Hakim-inspektor: Asim Xudiyev.
AFFA nümayəndəsi: Erkin Hüseynov.
Bakı, “Bank Respublika Arena”. Saat 18.00.

Tura paytaxt derbisiylə yekun vurulacaq. Bizi çox maraqlı, gərgin qarşılaşmanın gözlədiyini iddia edə bilərik. Məlumdu ki, “Sabah” məhz “Neftçi”nin meydanında kuboku başı üzərində qaldırdı. Bununla belə, çempion məhz bu matçda mükafatlandırılacaq. Onsuz da xala ehtiyacı olan “ağ-qaralar” daim “bu şəhər ikimizə dar”, - deyə onlara acıq verən “bayquşlar”ın bayram əhvalını korlamağa çalışmalıdı. “Sabah”ın oyunçuları isə təbii ki, qızıl medalları qələbənin ardından boynuna taxmaq istəyər.

Bu komandalar indiyə qədər 29 dəfə üz-üzə gəlib. Bunların 9-da “bayquşlar”, 13-də “ağ-qaralar” qələbə qazanıb, 7-də “sülh” qeydə alınıb. Topların nisbətində “Neftçi” öndədi – 34:24.

1. Sabah 31 23 6 2 72-22 75
2. Qarabağ 31 19 6 6 64-24 63
3. Turan Tovuz 31 17 8 6 41-22 59
4. Neftçi 31 14 11 6 54-31 53
5. Zirə 31 12 14 5 39-32 50
6. Sumqayıt 31 12 5 14 41-43 41
7. Araz-Naxçıvan 31 11 7 13 39-56 40
8. Şamaxı 31 8 11 12 27-35 35
9. İmişli 31 7 12 12 22-39 33
10. Kəpəz 31 8 3 20 25-57 27
11. Qəbələ 31 5 6 20 27-47 21
12. Karvan-Yevlax 31 3 5 23 21-63 14

Bombardir: Coy-Lens Mikels (Sabah) – 19, Velko Simiç (Sabah) – 11, Bassala Sambu, Emin Mahmudov (hər ikisi “Neftçi”) - 11.

KƏNAN BAHADIR