Ölkə kubokunun yarımfinalının "Turan Tovuz" - "Zirə" oyununda səhvlərlə ölkəyə səs salan Əliyar Ağayevin uzun müddətdən sonra yeni təyinat aldığını yazmışdıq. Belə ki, həmin matçda "bozqurd"un xeyrinə iki penaltini təyin etmədiyinə görə cəzalandırılan ədalət təmsilçisi aprelin 3-dən sonra ilk dəfə mayın 8-də əvəzedicilər liqasında göründü. FİFA referisi 25-ci turun "Zirə-2" - "Sumqayıt-2" görüşünü (3:1) idarə etdi.

Əliyar bəy növbəti dəfə təyinat alıb. Bu dəfə daha yüksək səviyyəli yarışa. Amma söhbət premyer-liqadan yox, 1-ci liqadan gedir. Daha dəqiqi, "fit sahibi" 26-cı turun sabah keçiriləcək "Səbail" - "Şahdağ Qusar" oyununda baş hakim olacaq.

Göründüyü kimi, kobud səhvləri üzündən ciddi təzyiqə məruz qalan, karyerasında ciddi eniş yaşayan Əliyar Ağayev yenidən yüksəlişə keçib. Böyük ehtimalla, hər şey yolunda getsə, onu premyer-liqanın sonuncu - 33-cü turunda iş başında görə bilərik.

KƏNAN BAHADIR