''Fənərbaxça''nın baş məşqçisi postuna namizədlərin sırasına daha bir önəmli isim əlavə olunub. Söhbət Antonio Kontedən gedir.

"Football-plus.az" xəbər verir ki, ünlü mütəxəssis ''Napoli''dən ayrılmağa çox yaxındı. İtaliya mətbuatının yazdığına inansaq, hələ rəsmi açıqlama gəlməsə də, rəhbərliklə məşqçi arasında müqavilənin ləğvi barədə danışıqlar başlayıb.

Neapol təmsilçisi ötən mövsüm mühüm bir performans sərgiləyərək çempion olsa da, bu mövsüm bir çox mövzuda Konte ilə rəhbərlik arasında fikir ayrılığı yaşandı. Bu da nəticələrdə öz əksini tapdı. Son turdakı ''Udineze'' ilə matçın ardından ayrılıqla bağlı yeni xəbərlərin olacağı gözlənilir.

56 yaşlı məşqçinin yeni iş yerinə gəlincə, onun iki əsas seçimi var. Biri İtaliya yığması, digəri ''Fənərbaxça''. Konte hazırda ''Skuadra adzurra''nın başına keçməyə əsas namizəd hesab olunur. İyunun 22-də İtaliya Futbol Federasiyasında prezident seçkiləri keçiriləcək. Yeni rəhbərliyin dərhal Konte ilə danışıqlara başlayacağı güman edilir. Onun yığmaya təyinatı baş tutmasa və ya ortaya hər hansı bir problem çıxsa, ''Fənər''in şansları artacaq.

Məlum olduğu kimi bir müddət öncə ''sarı-lacivərdlilər''in prezidentliyə namizədlərindən olan Hakan Safi İtaliyaya - Milana yollanmışdı. Onun Rafael Leao ilə bağlı danışıqlar apardığı iddia edilmişdi. Amma indi məlum olub ki, Safi başqa danışıqlar da aparıb. Məsələn, o, əfsanəvi Paolo Maldiniyə klubda baş məsləhətçi vəzifəsini təklif edib! Elə məhz Maldini ilə söhbət əsnasında Konte versiyası ortaya çıxıb və Safi fürsətdən istifadə edərək Maldininin sayəsində ünlü məşqçi ilə də telefonda söhbət edib.

Türkiyəli jurnalist Sərcan Həmzəoğlunun xəbərinə görə tərəflər arasında ilk danışıqlar kifayət qədər uğurlu keçib. Konte işlədiyi klublarda qazandığı ölkə çempionluqları ilə diqqət çəkir. O, avrokubok yox, çempionat məşqçisi hesab olunur. ''Napoli''dən başqa ''Yuventus'', ''İnter'' və ''Çelsi'' ilə də çempion olub. 12 ildi, çempion ola bilməyən və bu baxımdan tarixinin ən çətin dönəmini yaşayan ''Fənər''ə də məhz bu cür məşqçi lazımdı. Ona görə də ''Fənər''lə Konte arasında danışıqların hansı mərhələyə qədər irəliləyəcəyi maraq doğurur. Ancaq Safi planlarını həyata keçirmək üçün ilk növbədə iyunun 6-7-də keçiriləcək prezident seçkilərində Əziz Yıldırıma qalib gəlməlidi.