Ardıcıl 4-cü çempionluğunu qazanan ''Qalatasaray''da bəzi futbolçularla bağlı artıq qərar verilib.

"Football-plus.az" xəbər verir ki, söhbət ilk növbədə icarə əsasında klubda top qovan Saşa Boe, Noa Lanq və Yaser Asprilyadan gedir. İstanbul nəhəngi dəyərləri 20-30 milyon avro civarında dəyişən bu oyunçuları daimi əsasda transfer etməmək qərarına gəlib. Bu da o deməkdi ki, Boe ''Bavariya''ya, Lanq ''Napoli''yə, Asprilya isə ''Jirona''ya geri dönəcək. Ancaq durumu ən çox maraq doğuran futbolçu əlbəttə ki, Mauro İkardidi.

Müqavilə müddəti başa çatmaq üzrə argentinalı forvardın meneceri Elio Pina hazırda danışıqlar üçün İstanbuldadı. Son xəbərlərə inansaq, danışıqlar uğurlu məcrada keçir. ''Qalatasaray''ın konkret bir tələbi var. İstanbul nəhəngi 10 milyon avroya bərabər olan illik maaşı yarıbayarı azaldılmasını tələb edir. Yalnız bu şərti qəbul edəcəyi təqdirdə İkardi ''Qalatasaray''da qalacaq. Ünlü forvard isə öz növbəsində az şans qazanmasından narazıdı. O, maaşının azaldılmasına razı olsa belə hər matç ehtiyatda qalmaq istəmir. Tərəflər arasındakı danışıqların bu həftənin sonuna qədər yekunlaşacağı gözlənilir.

Danışıqların uğurla bitməsi ehtimalı uğursuzluqla bitməsi ehtimalından çox olsa da, indidən dəqiq bir söz demək çətindi. Son 4 çempionluğun hər birində müəyyən imzası olan 33 yaşlı futbolçu geridə qoyduğumuz mövsümdə 47 rəsmi oyunda iştirak edərək aktivinə 16 qol, 3 məhsuldar ötürmə yazıb.