Misli premyer-liqasının 32-ci turunun mərkəzi oyunu Masazırda olacaq: “Sabah” “Neftçi”ni qəbul edəcək. Tərəflərin ilk dövrədəki oyunu “sülh”lə başa çatmışdısa, ikinci qarşılaşmada “Sabah” meydandan qələbə ilə ayrılmışdı.

“Neftçi”nin 3 illik həsrətə son qoymasının vaxtı çatıb. Bu derbidə qələbə “ağ-qaralar”ın avrokuboklara vəsiqəsini rəsmiləşdirəcək. “Sabah”ın çempionluğu “Neftçi”nin “Qarabağ” üzərindəki qələbəsindən sonra dəqiqləşmişdi. İndi də əsl şansdı ki, flaqman elə “Sabah”ı məğlub edib, istəyinə nail olsun. “Bayquşlar” “qartallar”la oyundan sonra yorğundu, çempionat üçün də motivasiyası yoxdu. Düzdü, "Neftçi” adı Azərbaycan futbolunda istənilən oyunçuya səbəbsiz motivasiyadı.

Yuri Vernidub indiyə qədər komandanı “Sabah”a qarşı meydana çıxarmayıb. 5 illik həsrətə son qoyan - “Qarabağ”ı məğlub edən ukraynalı bu dueldən də qalib ayrılmalı, “Sabah”a “bu şəhər ikimizə dar” deməlidi. Özünün dediyi kimi: başqa yol da yoxdu.

MÜZƏFFƏR QULUZADƏ