"Birinci oyunda səhvlər çox oldu. Həm yaratdığımız epizodları düzgün dəyərləndirə bilmədik, həm də rəqibin fərqlənməsi üçün boşluqlar verdik".

"Football-plus.az" xəbər verir ki, bu sözləri yoldaşlıq oyununda Danimarka ilə qarşılaşan və iki gün əvvəlki məğlubiyyətin (1:4) revanşını alan millimizin 3-cü qolunun müəllifi Ədalət Ələkbərov deyib.

O, Azərbaycan Futzal Federasiyasının mətbuat xidmətinə açlıqlamasında 4:2 hesablı qələbəni şərh edib:
"Oyundan sonrakı gün baş məşqçi səhvlərimizi göstərdi, nələri düzgün etmədiyimizi dedi, necə oynamalı olduğumuzu bir daha videoanalizlərlə başa saldı. Təbii ki, qısa vaxt ərzində hər şeyi dəyişmək mümkün deyil. Ancaq bəsit səhvlərdən qaçdıq. Üstəlik, məğlubiyyətin yaratdığı məyusluq və revaş istəyi qələbənin əldə olunmasında kömək oldu. Doğma meydanda oynayırdıq, məsuliyyət ikiqat idi. Düzdü, rəqib Avropada futzal üzrə sayılıb-seçilən komanda deyil. Amma bu gün hər biri sürətlə inkişaf edir. Onlar bizdən əvvəl Norveçi böyük hesabla udub, rəsmi görüşdə Qazaxıstan kimi güclü və təcrübəli heyətə malik komandanı yeniblər. Bu onu göstərir ki, zəif rəqib yox, oyuna zəif yanaşma olur".

Ələkbərov vurduğu qolu dünyasını vaxtsız dəyişən atasına həsr etdiyini bildirib:
"Əlbəttə, qol vurduğuma görə xoşbəxtəm. Buna qədər U-19-un heyətində dəfələrlə fərqlənsəm də, əsas millidə ilk qolum oldu. İlklər hər zaman yadda qalan və əziz olur. Vurduğum qolu dünyasını vaxtsız dəyişmiş atama ithaf edirəm”.