Fransanın köklü klublarından olan ''Nitsa'' hazırda çox çətin dönəmdən keçir.

"Football-plus.az" xəbər verir ki, ötən mövsümü 4-cü pillədə başa vuran bu kollektiv hazırda Liqa-1-də 10-cu pillədədi. ''Nitsa''nın son 6 rəsmi matçın hamısında uduzması fanatları hiddətləndirib.

Komanda ətrafında ciddi xaos yaşanır. Nitsalılar son olaraq bazar günü səfərdə ''Loryan''a 1:3 məğlub oldular. Komanda matçın ardından öz bazasına qayıtdıqdan sonra böyük bir şok yaşayıb. Bazada futbolçuları 400-ə yaxın azarkeş gözləyirmiş. Onlardan biri avtobusun içinə minərək və sərt ifadələr işlədərək futbolçuları aşağı enməyə çağırıb. Bu məqamda təhlükəsizliyin çox zəif və passiv şəkildə təmin olunması futbolçuları təəccübləndirib.

Onlardan bəziləri avtobusdan aşağı enməyə məcbur olub və məhz həmin anda ciddi çaxnaşma yaşanıb. ''Nitsa'' fanatları bütün çərçivələri aşaraq futbolçuların üstünə tüpürüblər, onları təhqir ediblər və fiziki xəsarətlər yetiriblər. Onların əsas hədəfi isə Terem Moffi ilə Jeremi Boqa olub. Fanatlar baş məşqçi Frank Hayzın da istefasını tələb ediblər. Məsələ bununla da bitməyib. Həmin azarkeşlər sosial şəbəkədə paylaşım edərək Moffi ilə Boqanın bundan sonra ''Nitsa''nın heyətində meydana çıxmayacağını bildiriblər.

Maraqlıdı ki, klubdan bu qalmaqal ilə bağlı heç bir rəsmi açıqlama gəlməyib. Bu iki futbolçunun gələcək taleyi maraq doğurur.