Ötən mövsümü 10-cu pillədə tamamlayan və Sərgən Yalçınla yollarını ayırandan sonra mayın sonlarında “Fənərbaxça”nın əfsanəsi Aleks de Souza ilə anlaşan “Antalyaspor”da məşqçilər korpusu ilə bağlı ciddi problem yaşanıb.

Hadisə Burdur vilayətində toplanış keçən komandanın son məşqlərindən birində yaşanıb. Məsələ burasındadı ki, rəhbərliyin qərarı ilə məşqlər fanatlara və mətbuata qapalı şəkildə keçirilir. Amma cümə günü məşqin ardından bəzi futbolsevərlər Aleksə yaxınlaşaraq onunla həm şəkil çəkdirdilər, həm də ona “Fənərbaxça”nın formalarına imza atdırdılar. “Sambaçı” bu hərəkətdə qeyri-adi bir şey görməyərək həmin fanatların istəyini geri çevirmədi. Amma bu olay “Antalyaspor” fanatları arasında çox böyük narazılıq doğurub. Hər halda, onları anlamaq olar. Çünki sıravi azakeşlər komandanın məşqinə buraxılmadığı halda, “Fənərbaxça” fanatları fərqli yollarla Aleksə qovuşmağı bacarıblar. Antalyalılar tərəfindən böyük müzakirələrə səbəb olan görüntülərin sosial şəbəkələrdə yayılmasının ardından rəhbərlik sərt bir bəyanat yaydı.

Məlum oldu ki, bu, sırf həmin məşqdə təhlükəsizliyə cavabdehlik daşıyan şəxslərin məsuliyyətsizliyinin nəticəsidi. Bəyanatda bu məsələnin hərtərəfli şəkildə araşdırılacağı və işə məsuliyyətsiz yanaşan şəxslərə ən sərt şəkildə xəbərdarlıq ediləcəyi vurğulanıldı. Hətta bu olay Alekslə rəhbərlik arasında da münasibətlərin pozulmasına səbəb oldu. Şayiələrə inansaq, 46 yaşlı məşqçinin meneceri Türkiyəyə dəvət olunub. Bir ara hətta Alekslə yolların ayrılacağı da iddia edildi. Amma hələ ki bu xəbərlər təsdiqini tapmayıb.

“Ağ-qırmızılar” bu məşqçinin başçılığı altında 2024/25 mövsümünə hazırlığı davam etdirir. Bazar günü isə “Antalyaspor” Aleksin başçılığı altında ilk hazırlıq oyununu keçirib. Komanda Burdurda Rusiya təmsilçisi “Akron”la qarşılaşıb. Görüş antalyalılar üçün uğursuz alınıb. Tarixində ilk dəfə bu həftəsonu start götürəcək Rusiya premyer-liqasına vəsiqə qazanan “Akron” 3:2 hesabıyla qalib gəlib.