Serbiya çempionatının 9-cu turunun mərkəzi oyununda ''Partizan'' ''Srvena Zvezda''nı qəbul etdi.

''Partizan'' ölkənin əsas derbisində doğma fanatları önündə rüsvay olaraq dörd cavabsız qolla məğlub oldu. Matçın ardından gözü dönmüş bəzi yerli fanatlar futbolçulara narazılıqlarını bildirərək paltardəyişmə otağına yollandılar. Onlar polislərin gözündən yayınaraq həm dəhlizdə, həm də paltardəyişmə otağında çaxnaşma saldılar. Paltardəyişmə otağının qapısındakı şüşənin sınması nəticəsində ''Partizan''ın baş məşqçisi Aleksandar Stanoyeviç üzündən yüngül xəsarətlər aldı. Mətbuat konfransında onun üzündəki yaralar diqqətdən qaçmadı. Amma fanatlarla futbolçular arasında əlbəyaxa dava düşmədi. Çünki polis olaya dərhal müdaxilə etdi. ''Partizan''ın ''Qrobari'' fan-qrupu öz sərtliyi bütün Avropada tanınır. Çox güman ki, bu hadisəni də məhz onlar törədib. Elə oyundan 1 gün öncə də bu fan qrupun üzvləri ''Partizan''ın stadionunda yanğın törətmişdilər. Bu üzdən hətta derbinin keçirilməsi də sual altına düşmüşdü.

Ötən mövsümün gedişində ''Konyaspor''u çalışdırmış Stanoyeviç ''Partizan''ın başına bu yay gətirilib. Komanda mövsümə çox uğursuz başlayaraq ilk 7 oyuna cəmi 11 xal toplayıb. 50 yaşlı mütəxəssis derbidəki məğlubiyyətə görə fanatlardan üzr istəyib.

ƏLİ