''Beşiktaş''ın ötən yay ''Riu Ave''yə icarəyə verdiyi Dəmir Ege Tıknazın gələcək taleyi baxımından qeyri-müəyyənlik yaranıb.

"Football-plus.az" xəbər verir ki, Portuqaliya klubunun 5 milyon avroya gənc dayaq yarımmüdafiəçisini daimi əsasda transfer etmək hüququ var.

Təxminən 1 ay öncə ''Beşiktaş'' prezidenti Sərdal Adalı portuqaliyalıların bu hüquqdan yararlanacağını demişdi. Həmin vaxt Portuqaliya mətbuatı da ''Riu Ave''nin türkiyəli futbolçunu 5 milyon avroya aldıqdan sonra bu yay ən azı 10 milyon avroya başqa kluba satacağını iddia etmişdi. Ancaq sonradan Portuqaliya klubu qərarını dəyişərək gözləmə mövqeyinə keçdi.

Görünür, bu futbolçuya görə gələn təkliflər bu klubun rəhbərliyini qane etməyib. Hərçənd ''A Bola'' nəşrinin yazdığına görə 20 yaşlı futbolçuya Portuqaliya nəhəngləri - ''Sportinq'', ''Benfika'', ''Portu''dan başqa ''Lill'' və ''Seltik'' də maraq göstərir. Zaman isə artıq tükənmək üzrədi. Dəmir Ege Tıknazın ''Riu Ave'' ilə icarə müddəti iyunun 10-da tamam olur.

Portuqaliya klubundan yenə xəbər çıxmasa, Dəmir Ege ''Beşiktaş''a qayıtmalı olacaq. ''Riu Ave'' onu daimi transfer etmək istəsə, 5 milyon avronun 2 milyonunu dərhal ''ağ-qaralar''ın hesabına yatırmalıdı. Bununla bağlı müqavilədə maddə var. Qalan məbləğ isə hissə-hissə ödəniləcək.

''Qartal''ın yetirməsi olan Dəmir Ege Tıknaz geridə qoyduğumuz mövsümdə ''Riu Ave''nin heyətində 33 rəsmi oyunda 4 qol, 2 məhsuldar ötürmə ilə fərqlənib. O artıq Türkiyə yığmasına da dəvət almağa başlayıb.