Mövsümün əvvəlində ''Beşiktaş''dan icarə əsasında ''Riu Ave''yə yollanan Dəmir Ege Tıknaz performansı ilə Portuqaliyada adından söz etdirməkdə davam edir.

20 yaşlı futbolçu bu klubda may ayının ən yaxşı oyunçusu seçilib! Bu xəbər ''Riu Ave''nin rəsmi sosial şəbəkə səhifələrində paylaşılıb. Qalib fanatların səsverməsi ilə müəyyənləşib.

Düzdü, ''Riu Ave'' mayda yalnız 3 oyun keçirdi və Dəmir Ege Tıknaz bunların yalnız 2-də iştirak etdi. Amma görünür, sondan əvvəlki turda ''Nasional'' ilə səfər qarşılaşmasında (3:3) sərgilədiyi performans onun bu mükafatı qazanması üçün yetərli olub. Dayaq yarımmüdafiəçisi olmasına baxmayaraq bu futbolçu həmin qarşılaşmada 2 qol birdən vurmuşdu. Dəmir Ege bu mövsüm sərgilədiyi oyunla ilk dəfə Türkiyə yığmasına da dəvət almışdı. Düzdü, yığmada debüt etmək hələ ona qismət olmayıb.

İstedadlı futbolçu bu mövsüm Portuqaliya klubunda keçirdiyi 33 rəsmi oyunda aktivinə 4 qol, 2 məhsuldar ötürmə yazıb. Bir müddət öncə ''Beşiktaş'' prezidenti Sərdal Adalı Dəmir Egeni bu yay 5 milyon avro qarşılığında ''Riu Ave''yə daimi əsasda satacaqlarını bildirmişdi.

Portuqaliya klubu isə bu futbolçunu 10 milyon avroya başqa kluba satacaq.