''Beşiktaş''ın yetirməsi olan Dəmir Ege Tıknazın taleyinə aydınlıq gəldi.

Xəbər verdiyimiz kimi 20 yaşlı yarımmüdafiəçi geridə qoyduğumuz mövsümü icarə əsasında ''Riu Ave''də keçirmişdi. O, Portuqaliya klubunda öz oyunu ilə diqqət çəkməyi bacarmış və hətta Türkiyə yığmasına da dəvət almağa başlamışdı. Mövsümün sonuna yaxın ''Riu Ave''nin 5 milyon avro ödəyərək onu daimi əsasda transfer edəcəyi və dərhal da başqa kluba baha qiymətə satacağı iddia edilmişdi. Bunu ''ağ-qaralar''ın prezidenti Sərdal Adalı özü dilə gətirmişdi. Amma Türkiyə mətbuatının yazdığına inansaq, ''Riu Ave'' icarə müddətinin tamam olduğu son günə, yəni iyunun 10-a qədər gözləsə də, türkiyəli futbolçuya görə sərfəli təkliflər almadı. Ona görə də portuqaliyalılar Dəmir Ege Tıknazı daimi əsasda transfer etmək hüququndan yararlanmadılar.

Bu da o deməkdi ki, istedadlı futbolçu ən azı yay hazırlıq dönəmini ''Beşiktaş''ın düşərgəsində keçirəcək. İddialara görə baş məşqçi Ole Qunnar Sulşer Tıknazın oyununu bəyənir və yeni mövsümdə onun xidmətindən yararlanmaq niyyətindədi.

Qeyd edək ki, son olaraq Meksika ilə qarşılaşmanın ikinci hissəsində meydana çıxmaqla Türkiyə yığmasında debüt edən Dəmir Ege Tıknaz dayaq yarımmüdafiəçisi kimi oynayır.

O ötən mövsüm ''Riu Ave''də 33 rəsmi oyuna çıxaraq aktivinə 4 qol, 2 məhsuldar ötürmə yaza bildi.