''Beşiktaş''a gəldiyi gündən bəri oyunu ilə fanatlar arasında birmənalı qarşılanmayan və müzakirələrə səbəb olan Əl-Musratinin klubda qalmaq istədiyi məlum olub.

"Football-plus.az" xatırladır ki, İstanbul nəhəngi liviyalı dayaq yarımmüdafiəçisini 2024-cü ilin fevralında 11 milyon avroya ''Braqa''dan transfer etmişdi.

Klub tarixinin ən bahalı oyunçusuna çevrilməsinə baxmayaraq 29 yaşlı futbolçu ona bəslənən ümidləri doğrultmadı. Bu mövsümün qış fasiləsində ''Monako'' onu 1 milyon avroya icarəyə götürdü. Fransızların Əl-Musratini daha 8 milyon avro ödəyərək daimi əsasda transfer etmək hüququ da var idi. Amma ''Monako'' bu hüquqdan yararlanmaq istəmədiyi üçün təcrübəli oyunçu Türkiyəyə geri dönməli oldu.

''Beşiktaş'' rəhbərliyinin Əl-Musrati üçün gələcək təklifləri gözlədiyi və bu yay onunla birdəfəlik vidalaşmaq istədiyi bildirilirdi. Amma Türkiyə mətbuatının yazdığına inansaq, Əl-Musrati rəhbərlikdən ona daha bir şans verilməsini xaiş edib. O, bu hazırlıq dönəmində özünü yaxşı tərəfdən göstərmək və baş məşqçinin diqqətini cəlb etmək üçün əlindən gələni edəcəyini vurğulayıb. Rəhbərlik isə bu məsələdə yekun qərarın Ole Qunnar Sulşerə aid olduğunu futbolçunun diqqətinə çatdırıb.

Norveçli mütəxəssisin ən azı hazırlıq dönəmində Əl-Musratinin durumunu yaxından gördükdən sonra onunla bağlı qərarını verəcəyi gözlənilir.