Türkiyəli futbolsevərlərə də gözəl tanış olan Anxelinyo ilə bağlı önəmli bir transfer xəbəri var.

"Football-plus.az" xatırladır ki, 28 yaşlı sol müdafiəçi bilindiyi kimi 2023-ün yayında icarə əsasında ''Leyptsiq''dən ''Qalatasaray''a gəlmişdi. Amma onun ulduzu Okan Buruk ilə barışmadığından ispaniyalı futbolçu qış fasiləsində Türkiyədən ayrılaraq İtaliyaya yollanmış və ikinci dövrəni icarə əsasında ''Roma''da keçirmişdi.

''Canavarlar'' ondan o qədər razı qaldılar ki, mövsüm tamamlanan kimi ''Leyptsiq''ə 5,4 milyon avro ödəyərək solaxay futbolçunu daimi əsasda transfer etdilər. İndi isə ''Roma'' Anxelinyonu bundan beşqat artıq qiymətə satmağa hazırlaşır!

Belə ki, təcrübəli futbolçu Səudiyyə Ərəbistanı nəhəngi ''Əl-Hilal''a keçməyin biraddımlığındadı. Tərəflər arasında üçillik anlaşma əldə olunub. ''Əl-Hilal'' ''Roma''ya 25 milyon avro təzminat, futbolçunun özünə isə illik 10 milyon avro maaş ödəyəcək!

Anxelinyo geridə qoyduğumuz mövsümdə ''Roma''da 51 rəsmi oyunda iştirak edərək aktivinə 4 qol, 6 məhsuldar ötürmə yazıb.