''Qalatasaray''la bağlı yeni transfer xəbərləri var.

Öncə qeyd edək ki, Olimpiu Morutsanın ''Piza''ya transferi rəsmiləşib. İtaliyanın B seriyası təmsilçisi rumıniyalı vingeri birilliyə icarəyə götürüb. Icarə haqqı kimi italyanlar istanbullulara 150 min avro ödəyəcək. ''Piza'' Morutsanı daimi əsasda transfer transfer etmək istəsə, gələn il mayın 31-nə qədər əlavə 5,5 milyon avro ödəməli olacaq. Amma bu maddə Morutsan mövsüm ərzində ən azı 25 matçda 45 dəqiqə forma geyəcəyi halda artıq məcburi şəkildə qüvvəyə minəcək.

Bu arada ''Qalatasaray''ın iki tanınmış futbolçu ilə apardığı danışıqların uğurla irəlilədiyi məlum olub. Söhbət Lukas Torreyra ilə Dris Mertensdən gedir. ''Arsenal''a məxsus olan Torreyra son iki mövsümü icarə əsasında ''Atletiko'' və ''Fiorentina''da keçirib. İtaliyalı jurnalist Fabritsio Romanonun verdiyi məlumata görə, 26 yaşlı dayaq yarımmüdafiəçisi İstanbul nəhənginə keçməyə razılıq verib. Məlumatda qeyd olunur ki, ''Cim-Bom'' uruqvaylıya görə ''Arsenal''a 6-7 milyon avro ödəyəcək. Torreyranın illik məvacibi isə 3,5 milyon avro təşkil edəcək. ''Arsenal'' bu oyunçunu 2018-in yayında ''Sampdoriya''dan 28 milyon avroya transfer edib.

Mertensə gəlincə, ''Qalatasaray'' ona illik 4 milyon avroluq maaş təklif edib. ''Napoli''dən ayrılan təcrübəli futbolçu azad agent statusunda olduğu üçün ''sarı-qırmızılar''ın bu həmləsini başa düşmək olar. 35 yaşlı futbolçu keçidə razılıq verəcəyi təqdirdə onunla ''1+1'' illik müqavilə imzalanacaq. Bundan başqa, ''Qalatasaray''ın bu yay transfer etdiyi oyunçulardan olan Serxio Oliveyranın sosial şəbəkədə Mertensi təqib etməyə başlaması da belçikalının Türkiyəyə gəlmək ehtimalının yüksək olduğunu göstərir. Xatırladaq ki, 2013-dən bəri ''Napoli”nin şərəfini qoruyan Mertens bütün turnirlərdə 148 qol vurub və klub tarixinin ən məhsuldar oyunçusudu. Amma təcrübəli futbolçu neapollularla müqaviləni yeniləməkdən imtina edərək bu yay klubdan ayrılıb.

ƏLİ