Paulo Dibala ''Roma''nı və Avropa futbolunu tərk etməyə hazırlaşır.

Ünlü argentinalı futbolçu Səudiyyə Ərəbistanına yollanır. ''Əl Qadisiya'' onun keçidini bitirmək üzrədi. Canluka Di Martsionun xəbərinə görə klublar arasında 3 milyon avroluq anlaşma əldə olunub. Dibalanın yeni klubunda illik qazancı isə diqqət çəkir. Onun ''Əl-Qadisiya''da illik 25 milyon avro maaş qazanacağı iddia edilir.

Müqavilə üçillik olacağı təqdirdə Dibala bu müddət ərzində 75 milyon avro qazanacaq! Əslində Dibalanın indiki transfer dəyəri 20 milyon avro civarındadı. Onun romalılarla müqaviləsində isə təzminat məbləği kimi 12 milyon avro qeyd olunub. Sadəcə 30 yaşlı futbolçunun müqaviləsinin müddəti gələn il başa çatır. ''Roma'' gələn yay onu havayı buraxmaqdansa, indi 3 milyon avroya satmağa üstünlük verir. Həm də futbolçunun maaşı yüksəkdi və ''canavarlar'' bu maaşdan da qurtulmuş olacaqlar.

Qeyd edək ki, uzun illər ''Yuventus''un şərəfini qorumuş Dibala 2022-dən ''Roma''dadı. O indiyə qədər bu klubda 78 rəsmi oyuna çıxaraq 34 qol, 18 məhsuldar ötürmə ilə fərqlənib.

ƏLİ