Mövsümü icarə əsasında çempionşip təmsilçisi ''Lester''də keçirən Yunus Akgün müqavilə ilə məxsus olduğu ''Qalatasaray''a geri dönüb.

Məlum olduğu ''tülkülər'' çempionşipin qalibi olaraq premyer-liqaya döndülər. Komanda ötən yay İstanbul nəhənginə 500 min avro ödəyərək gənc türkiyəli vingeri icarəyə götürmüşdü.

Yunus İngiltərə futboluna alışmaqda çətinlik çəkdi və əsas heyət üzvünə çevrilə bilmədi. O, 34 rəsmi oyunda iştirak edərək 1536 dəqiqə meydanda qaldı və 2 qol, 4 məhsuldar ötürməlik performans sərgilədi. ''Lester''in 9 milyon avro ödəməklə 23 yaşlı futbolçunu daimi əsasda transfer etmək hüququ var idi. Amma komanda bu hüquqdan yararlanmaq istəmədi. Yunus öz səhifəsində paylaşım edərək ''Lester''ə minnətdarlığını bildirdi. Bu yay ''Qalatasaray''a İngiltərədən daha bir futbolçu - Nikolo Zanyolo da qayıdacaq.

İtaliyalı ulduz mövsümü icarə əsasında ''Aston Villa''da keçirmişdi. Birmingemlilər bu futbolçunu 25 milyon avroya daimi əsasda transfer etmək hüququndan yararlanmadılar. Beləcə ''Qalatasaray''ın Yunus ilə Zanyolonun satışından ümumilikdə 33-34 milyon avro qazanmaq planı baş tutmadı. Hər iki futbolçu yeni mövsümə ''Qalatasaray''da başlayacaq.

ƏLİ