''Lill''dəki ''Türkiyə koloniyası'' tamamilə dağılmaq üzrədi.

Burak Yılmaz artıq komandadan ayrılıbsa, ötən mövsümün ikinci dövrəsini icarə əsasında ÇSKA-da keçirən Yusuf Yazıcı da Fransa klubuna qayıtmaq istəmir. ''Lill''də qalan sonuncu türkiyəli olan Zeki Çelikin də bu yay ayrılmaq ehtimalı yüksəkdi. Daha öncə ''Atletiko''nun hədəfində olan sağ cinah müdafiəçisinə indi də Joze Mourinyonun ''Roma''sı ciddi maraq göstərir. ''Skay Sports''un yaydığı xəbərə inansaq, ''Roma'' ''Lill'' ilə danışıqlara başlayıb. Fransızlar 10 milyon avro tələb edir. İtalyanlar isə bu məbləği 7-7,5 milyon avroya endirməyə çalışır. Bundan başqa ''Roma'' Zekinin özünə bonuslardan əlavə illik 2 milyon avro maaş təklif edir. Qeyd edək ki, ''Lill'' 25 yaşlı bu futbolçunu 2018-ci ildə ''İstanbulspor''dan 2,5 milyon avroya transfer edib. Zeki geridə qoyduğumuz mövsüm 40 rəsmi oyunda 3 qol, 3 məhsuldar ötürmə ilə fərqlənmişdi.