Yeni mövsümə hazırlıq dönəminə srağagün start verən “Qalatasaray”la bağlı transfer xəbərləri var.

Hakim Ziyeşi daimi əsasda transfer edən Türkiyənin son çempionu daha bir təcrübəli futbolçu ilə yola davam etmək qərarına gəlib. Belə ki, müqavilə müddəti bu yay bitən Dris Mertenslə yeni - birillik müqavilə imzalanıb. Belçikalı ulduz yeni mövsümdə 2,9 milyon avro maaş alacaq. “Qalatasaray”da keçirdiyi hər iki mövsümdə çempionluq sevinci yaşayan və 2023/24-də 18 məhsuldar ötürmə ilə superliqanın assist kralı olan Mertens ümumilikdə sarı-qırmızı forma ilə meydana çıxdığı 84 rəsmi oyunda 19 qol, 23 məhsuldar ötürməlik performans sərgiləyib.

Bu arada Nikolo Zanyolonun da taleyinə dünən, nəhayət, aydınlıq gəldi. İtaliyalı ulduz “Qalatasaray”dan ayrıldı. Hələ iyulun 3-də vətəninə yollanaraq “Atalanta” ilə anlaşan və tibbi müayinədən uğurla keçən futbolçunun transferi dünən başa çatdı. Keçidin detallarına gəlincə, “Atalanta” Zanyolonu birilliyə icarəyə götürüb. Berqamo təmsilçisi birillik icarə haqqı kimi İstanbul nəhənginə 6,4 milon avro ödəyəcək. Müqavilədə yer alan şərtlər həyata keçəcəyi təqdirdə “Atalanta” gələn yay daha 15,5 milyon avro ödəyərək Zanyolonu daimi əsasda transfer etməli olacaq. Bu şərt rəsmi şəkildə açıqlanmasa da, Türkiyə mətbuatının yazdığına görə, söhbət “Atalanta”nın mövsüm ərzində keçirəcəyi rəsmi oyunların 60 faizində meydana çıxmaqdan gedir. Bundan başqa, müqavilədə “Qalatasaray”a maksimum 2 milyon avro qazandıracaq performans bonusları da mövcuddu.

Xatırladaq ki, “Qalatasaray” 25 yaşlı vingeri 2022/23-ün qış fasiləsində 15 milyon avroya “Roma”dan transfer edib. Həmin mövsümün ikinci dövrəsində superliqada 5 qol vuran və “Cim-Bom”la çempion olan Zanyolo ötən mövsümü icarə əsasında “Aston Villa”da keçirdi. Amma onun İngiltərə macərası çox da uğurlu alınmadı və Zanyolo 39 rəsmi oyuna çıxaraq 3 qol vurdu. Bu futbolçunun “Qalatasaray”la 2027-yə qədər müqaviləsi var.