Qış transfer dönəmində həm hücumu, həm də müdafiəni gücləndirmək istəyən ''Qalatasaray''a iki futbolçudan müjdəli xəbər var.

Belə ki, mövsümün əvvəlində icarəyə göndərilən Nikolo Zanyolo və Derrik Könün sayəsində İstanbul nəhəngi ciddi gəlir əldə etmiş olacaq. Yayda 6,4 milyon avroya ''Atalanta''ya icarəyə verilən Nikolo Zanyolo bu mövsüm artıq 16 rəsmi oyunda forma geyib. Onun müqaviləsindəki məcburi transfer maddəsinin qüvvəyə minməsi üçün cəmi 3 rəsmi oyun qalıb. İtaliyalı ulduz 3 oyuna da çıxacağı təqdirdə ''Atalanta'' ''Cim-Bom''a 15,5 milyon avro ödəyərək Zanyolonu daimi əsasda transfer etməli olacaq. Hətta müqavilədəki digər bonus şərtləri də həyata keçsə, ''sarı-qırmızılar'' daha 2 milyon avro qazanacaqlar. Bundesliqa təmsilçisi ''Verder'' isə ''Qalatasaray''dan icarəyə götürdüyü Derrik Könün performansından razıdı.

Almaniya mətbuatının yazdığına inansaq, ''Verder'' rəhbərliyi ''sarı-qırmızılar''a 5,25 milyon avro ödəyərək 25 yaşlı sol müdafiəçini daimi əsasda transfer edəcək. ''Qalatasaray'' 1 il öncə Könü 3,35 milyon avroya heyətinə qatmışdı. Türkiyə çempionu bu iki futbolçunun satışından ümumilikdə 20 milyon avrodan çox pul qazanacaq. Zanyolo bu mövsüm 16 rəsmi oyunda 3 qol, 2 məhsuldar ötürmə, Kön isə 18 rəsmi oyunda 2 qol ilə fərqlənib.

ƏLİ