Deyəsən ''Qalatasaray'' transfer dönəminin sonuna qədər müdafiənin sol cinahını gücləndirməli olacaq. Çünki həmin mövqe ilə bağlı yeni xəbərlər var.

Bir müddət öncə ''Qalatasaray'' ''Spartak''ın Derrik Könə görə 8 milyon avroluq təklifini geri çevirmişdi. Amma Moskva nəhəngi ikinci dəfə İstanbul nəhənginin qapısını döyüb. Bu dəfə təklif 10 milyon avroluqdu. Almaniyalı futbolçu bu dəfə ''Cim-Bom''dan ayrıla bilər. Könün son olaraq Türkiyə superkubokunda ''Beşiktaş''la oyunda sərgilədiyi performans baş məşqçi Okan Buruku qane etməmişdi. Solaxay futbolçu ötən mövsümün qış fasiləsində 3,35 milyon avroya ''Hannover-96''dan transfer edilib və ''sarı-qırmızılar''da indiyə qədər 16 rəsmi oyunda 1 qol, 2 məhsuldar ötürmə ilə fərqlənib.

Kön ayrılacağı təqdirdə ''Qalatasaray'' diqqətini ''Reyncers''li Rıdvan Yılmaza və ''Molde''li Matias Lövikə yönəldəcək. Lövikin son olaraq ''instaqram''da ''Qalatasaray''ı təqibə alması diqqət çəkib. Rıdvan Yılmaz ''Beşiktaş''ın yetirməsidi.

''Qalatasaray'' ötən mövsümün qış transfer dönəmində də ona maraq göstərmiş, amma keçidi tamamlaya bilməmişdi.

ƏLİ