Qış transfer dönəmində heyətə əl gəzdirmək niyyətində olan ''Qalatasaray''ın qarşısına sürpriz maneə çıxıb.

"Cim-Bom'' yeni qaydalara görə qışda heç bir oyunçusunu icarəyə verə bilməyəcək. ''Sarı-qırmızılar'' mövsümün əvvəlində 5 futbolçusunu icarəyə göndərmiş, 6-cı futbolçu kimi isə öz yetirməsi olan Baran Aksakanı Bolqarıstan təmsilçisi ''Arda''ya icarəyə vermişdi. Komanda qışda legioner limitində yer açmaq üçün ilk növbədə heyətə düşməkdə çətinlik çəkən yeni transfer Elias Yelerti başqa kluba icarəyə vermək istəyirdi. Futbolçunun menecerinə də bununla bağlı məlumat verilmişdi. Eləcə də Yusuf Dəmir və Viktor Nelssonun da icarəyə verilməsi gündəmdə idi. Amma FİFA-nın bu ilin iyulun 1-dən qüvvəyə minən yeni qaydasına görə bir klub bir mövsümdə ölkə xaricinə maksimum 6 futbolçusunu icarəyə verə bilər.

''Qalatasaray''da bu limit artıq dolub! Artıq adını qeyd etdiyimiz Baran Aksakadan başqa bu yay Uilfrid Zaha ''Lion''a, Nikolo Zanyolo ''Atalanta''ya, Derrik Kön ''Verder''ə, Kazımcan Karataş ''Orenburq''a və Mattias Ross ''Sparta''ya icarəyə verilib. İndi ''Qalatasaray'' üçün yeganə çarə özünə lazım olmayan bəzi futbolçuları daimi əsasda sata bilməkdi.

ƏLİ