2023-ün yayında “İnter”dən “Fənərbaxça”ya gələn Edin Ceko yaşı irəliləməsinə rəğmən, məhsuldar oyun sərgiləməkdə və fanatların sevgisini qazanmaqda davam edir. Onun Türkiyədəki ilyarımlıq dönəmini birmənalı şəkildə uğurlu saymaq olar.

Hərçənd “Fənər” bu yay 20,5 milyon avro qarşılığında Türkiyə futbol tarixinin ən bahalı transferi olan Yussef Ən-Nəsirini heyətinə qatdıqdan sonra çoxları Cekonun ehtiyatda qalacağını düşünürdü. Hətta onun ayrılmaq variantı da yaranmışdı. Amma 38 yaşlı futbolçu nəinki klubda qaldı, hətta hazırda göstəriciləri ilə adını “Fənər” tarixinə yazdırmış bir durumdadı.

Ünlü bosniyalı forvard indiyə qədər “sarı-lacivərdlilər”in heyətində 59 rəsmi oyunda forma geyərək 34 qol, 12 məhsuldar ötürməlik performans sərgiləyib. Yəni 46 qolun vurulmasında yaxından iştirak edib. Bu da o deməkdi ki, Ceko hər oyunda orta hesabla 0,77 qolun vurulmasında pay sahibi olur.

Klub tarixində ən azı 50 oyunda forma geymiş əcnəbi futbolçuların göstəricilərini ələk-vələk etsək, görərik ki, Ceko bu performansla yalnız bir oyunçudan geri qalır! Söhbət Aleks de Souzadan gedir. Aleks 344 rəsmi oyunda 171 qol, 146 məhsuldar ötürmə ilə 317 qolun vurulmasında yaxından iştirak edib. Bu da onun hər oyuna orta hesabla 0,92 qolda yaxından iştirak etməsi deməkdi.

3-cü pillədə Pyer van Hooydonk (0,74) qərarlaşıb. İlk “10-luq”da indi heyətdə olan əcnəbilərdən daha birinin adına rast gəlmək mümkündü. Bu, Duşan Tadiçdi (0,62). Serbiyalı ulduz 69 rəsmi oyunda 22 qol, 21 məhsuldar ötürmə ilə 10-cu pillədə qərarlaşıb.