Bu yayın Türkiyədə ilk mühüm transferinin müəllifi “Fənərbaxça” oldu.

"Football-plus.az" xəbər verir ki, daha öncə heyətini ingiltərəli vinger Rayan Kentlə gücləndirməklə və qapıçı İrfan Can Eğribayatla daimi əsasda müqavilə imzalamaqla transfer dönəminə sürətli daxil olan İstanbul nəhəngi bosniyalı ulduz Edin Cekonun da transferini bitirdi.

Avropada son illərin ən önəmli qolçularından biri olan Ceko srağagün səhər saatlarında İstanbula ayaq basdı. 37 yaşlı futbolçu tibbi müayinədən keçəndən sonra ikiillik müqaviləyə imza atdı. Futbolçunun maaşına gəlincə, illik qazancı 4,2 milyon avro təşkil edəcək. Ceko “İnter”dən ayrılaraq azad agent stausunda olduğu üçün “Fənər”ə havayı başa gəlib. Adətən, belə statusda olan tanınmış oyunçulara Türkiyədə imza parası da ödənilir. Klubun rəsmi açıqlamasında bu mövzuya və performans bonuslarına yer verilməsə də, Türkiyə mətbuatının yazdığına inansaq, “Fənər” Cekoya 2 milyon avro imza parası da ödəyəcək!
Təbii ki, ilk növbədə futbolçunun yaşı diqqəti cəlb edir. 37 yaşda bəzi futbolçular artıq karyerasını başa vurur. Və ya təzyiqin az, pulun çox olduğu ölkələrə yollanmağa üstünlük verirlər. Məsələn, Marek Hamşik Cekodan 1 yaş kiçik olduğu halda, artıq futbolla vidalaşmaq qərarına gəlib. Amma təcrübəli forvard fiziki cəhətdən yetərincə yaxşı formadadı. Geridə qoyduğumuz mövsüm 30 yaşlı Romelu Lukakunun ehtiyatda qalmasına səbəb olan Ceko bir dəfə də zədələnmədi və 52 rəsmi oyunda 14 qol, 6 məhsuldar ötürmə ilə fərqləndi. Ümumiyyətlə o, son 5 mövsümün heç birində 38-dən az oyun keçirməyib (2021/22 - 49 oyun, 17 qol, 10 ötürmə, 2020/21 – 38 oyun, 13 qol, 5 ötürmə, 2019/20 – 43 oyun, 19 qol, 14 ötürmə, 2018/19 – 40 oyun, 14 qol, 10 ötürmə). Qısaca qeyd edək ki, öz ölkəsinin təmsilçisi “Jelezniçar”ın yetirməsi olan Ceko karyerası ərzində bu klubdan başqa “Teplitse”, “Volfsburq”, “Mançester Siti”, “Roma”da çıxış edib. Joze Mourinyonun gəlişindən sonra “canavarlar”a lazım olmayan forvard son iki mövsümü “İnter”də keçirib. “Fənər”də “9” nömrəli formanı seçən Ceko klubun tarixinə 8-ci bosniyalı futbolçu kimi düşüb. “Sarı-lacivərdlilər”də daha öncə bu ölkədən Elvir Baliç (1998/99, 2000/01), Elvir Boliç (1995-00), Demir Hotiç (1993), Srebrenko Repçiç (1983-85), Suat Karaliç (1983/84), Muhamed İbrahimbeqoviç (1982/83) və Asim Ferhatoviç (1962/63) top qovub. Maraqlıdı ki, “Fənərbaxça” Cekonun transferinin videosunu Hande Yenərin “Beni Sev” mahnısı ilə təqdim edib. Görünür, ötən mövsüm “Qalatasaray”da Mauro İkardi Simge Sağının “Aşkın Olayım” mahnısını populyarlaşdırdığı kimi “Fənər” də Cekonun bu mahnını populyarlaşdırmasına çalışacaq. Hande Yenər zatən uzun illərdi “Fənər” azarkeşi kimi tanınır. Cekonun klubun rəsmi kanalına ilk açıqlaması belə olub: