“Fənərbaxça”nın əsas qol silahı Edin Cekodan gələn xəbər derbi ərəfəsində fanatları narahat etməyə bilməz.

"Football-plus.az" xəbər verir ki, təcrübəli bosniyalı forvard dünən səhər baş məşqçi İsmayıl Kartala və tibbi personala ağrılarının olmasından şikayətləndi. Bu üzdən riskə yol verilmədi və Ceko məşqi buraxmalı oldu. 37 yaşlı forvard xəstəxanaya aparılaraq ətraflı tibbi müayinədən keçirildi. Müayinənin cavabı bu gün bəlli olacaq və məşqçilər korpusu da buna əsasən hərəkət edəcək. Qeyd edək ki, “Fənər”i artıq sabah Kayseri səfərində çətin oyun gözləyir. Amma camiədə əsas diqqətlər dekabrın 24-nə yönəlib. Həmin tarixdə Kadıköydə bütün Türkiyənin səbirsizliklə gözlədiyi “Fənərbaxça” – “Qalatasaray” derbisi baş tutacaq. Üstəlik dekabrın 29-da əzəli rəqiblər bu dəfə Səudiyyə Ərəbistanında Türkiyə superkuboku çərçivəsində qarşılaşacaq. Belə vacib oyunlar ərəfəsində Cekonun zədələnməsi komandanı çətin durumda qoya bilər. Qeyd edək ki, bu futbolçu hazırda “Qalatasaray”lı Mauro İkardi ilə birlikdə 12 qolla superliqada bombardirlər yarışına başçılıq edir. Ümumilikdə Ceko “sarı-lacivərdlilər”in heyətində keçirdiyi 21 rəsmi oyunda 16 qol, 7 məhsuldar ötürməlik diqqətçəkən performans sərgiləyib.

Bu arada “Fənər”in unudulmuş oyunçularından olan Linkoln Enrikedən də xəbər var. Ötən mövsümün sonlarına yaxın meniskindən əməliyyat olunan braziliyalı yarımmüdafiəçinin müqaviləsi bu mövsümün ilk dövrəsi üçün dondurulmuşdu. “Sambaçı” artıq tam sağalıb. Amma məsələ burasındadı ki, o, baş məşqçi İsmayıl Kartalın planlarına daxil deyil. Rəhbərlik Enrikenin meneceri ilə əlaqə saxlayaraq ondan futbolçuya yeni klub tapılmasını tələb edəcək. Qeyd edək ki, Linkoln Enrike ötən mövsüm Avropa Liqasının 1/8 finalında “Sevilya” ilə oyunda zədələnmiş və onun diz bağları qopmuşdu. 25 yaşlı futbolçu həmin tarixdən bu yana heç bir rəsmi oyunda iştirak etməyib. “Fənər” ilə 2026-ya qədər müqaviləsi olan Enrikenin transfer dəyəri 4 milyon avro civarındadı.