2014-cü ildən bu yana davam edən çempionluq həsrətinə son qoymaq istəyən ''Fənərbaxça'' tarixi sayıla biləcək bir yay transfer dönəmini geridə qoymaq üzrədi.

"Football-plus.az" xəbər verir ki, İstanbul nəhəngi bu yay transferdə sanki fırtına kimi əsdi. Dünyaca ünlü baş məşqçi Joze Mourinyo ilə anlaşaraq bəlkə də bu transfer dönəminin ən vacib addımını atan ''Fənər'' heyətinə bir çox dünya səviyyəli ulduzları qatdı.

Komanda Mourinyo və 9 yeni transfer üçün belə desək, 127 milyon avroluq yükün altına girdi. ''Fənər'' bu yay Türkiyə futbolu tarixinin ən bahalı transferini reallaşdıraraq 19,5 milyon avroya ''Sevilya''dan Yussef Ən-Nəsirini transfer etdi. Merakeşli forvarda 4 il ərzində ümumilikdə 16 milyon avro maaş ödəniləcək.

Mourinyoya iki illik 21 milyon avro maaş veriləcək. Ən son Filip Kostiç ''Yuventus''dan birillik icarəyə götürüldü. Ona yalnız İtaliyada qazandığı illik maaş, yəni 1,8 milyon avro ödəniləcək. ''Fənər''in digər yeni transferi argentinalı Kristian Medina komandaya yanvarda qoşulacaq.O, maaşı ilə birlikdə komandaya 24 milyon avroya başa gələcək.

''Fənərbaxça''nın bu yay transfer edilənlər üçün büdcəsindən 56 milyon avro, onlara müqavilənin sonuna qədər ödəniləcək maaş üçün isə 76,4 milyon avro çıxacaq. Bu da ümumilikdə 127,4 milyon avro deməkdi!

ƏLİ