Joze Mourinyonun başçılığı altında mövsümə heç də pis start verməyən ''Fənərbaxça'' heyətini yeni futbolçu ilə gücləndirib.

İstanbul nəhəngi ötən mövsümü ''Mançester Yunayted''də keçirən, amma müqavilə ilə Fiorentinaya məxsus olan Mərakeş yığmasının üzvü Sofyan Amrabatı birillik icarəyə götürüb. İcarə haqqı kimi florensiyalılara 2 milyon avro ödəniləcək. Amma anlaşmanın şərtlərinə əsasən ''Fənər'' gələn yay daha 13 milyon avro ödəyərək 28 yaşlı oyunçunu daimi əsasda transfer etmək öhdəliyini də üzərinə götürüb. Cümə günü İstanbula gələn təcrübəli futbolçu tibbi müayinədən uğurla keçib.

Niderlandda doğulan Amrabat futbola da məhz bu ölkədə başlayıb. Əsasən dayaq yarımmüdafiəçisi kimi oynayan mərakeşli karyerasına ''Utrext''də start verib. Daha sonra ''Feyenoord'', ''Brügge'', ''Verona''da çıxış edib və 2020-də Florensiyaya yollanıb. Mərakeş yığmasının heyətində DÇ-2022-də öz oyunu ilə diqqət çəkməyi bacaran Amrabat ötən mövsüm ''Yunayted''də 30 rəsmi oyun keçirib. Xatırladaq ki, ''Fənər'' bu yay daha bir mərakeşli futbolçu - Yussef Ən-Nəsirini də heyətinə qatıb.

ƏLİ