Joze Mourinyonu baş məşqçi postuna gətirməklə dünya futbolunda diqqət çəkməyi bacaran ''Fənərbaxça'' indi də heyətini gücləndirir.

İstanbul nəhəngi anlaşma əldə etdiyi Yussef Ən-Nəsirini dünən İstanbula gətirdi. Bu transferin bu gün rəsmən açıqlanacağı gözlənilir. Merakeşli ulduzun gəlişi ilə birlikdə ''Fənərbaxça'' yeni bir göstəriciyə nail oldu. ''Transfermarkt''ə görə ''sarı-lacivərdlilər''in heyətinin dəyəri 251 milyon avroya çatıb. Bu, Türkiyə futbolu tarixində yeni rekorddu! Əvvəlki rekord cəmi 1 il ''yaşadı''. ''Qalatasaray'' keçən yay 247 milyon avroluq heyət qurmuşdu. Yəni ''Fənər'' əzəli rəqibini geridə qoydu.

Maraq üçün bildirək ki, hazırda Türkiyədə ən dəyərli heyətə malik klubların siyahısında 3-cü pillədə ''Trabzonspor'' (152 milyon avro), 4-cü pillədə ''Beşiktaş'' (149), 5-ci pillədə İstanbul BŞ (86) qərarlaşıb. Ən ucuz heyət isə superliqanın debütantı ''Bodrum''dadı (11).

ƏLİ