Türkiyədə yay transfer dönəmi dünən rəsmən başa çatdı.

İstanbulun iki nəhəngi ''Qalatasaray'' ilə ''Fənərbaxça'' arasında transferdə tarixi bir rəqabət izlədik. Bu rəqabət bir neçə rekordun yenilənməsinə səbəb oldu. ''Fənərbaxça'' həm satışdan əldə etdiyi gəlir, həm də yeni transferlərə xərclədiyi məbləğ ilə diqqət çəkdi. ''Sarı-lacivərdlilər'' Arda Gülər, Altay Bayındır, Salai, Bruma, Rossi, Berişa və Araonun satışından ümumilikdə 55,45 milyon avroluq Türkiyə futbolu üçün rekord olan gəlir əldə etdi! Üstəlik müqavilələrdə bonuslar da mövcud olduğundan sonrakı illərdə bu məbləğ bir qədər də artacaq.

Eyni zamanda ''Fənər'' heyətinə 15 yeni futbolçu cəlb etdi. Ceko, Tadiç, Kent, Ciku və Umut Nayır azad agent statusunda transfer olundu. Digər 10 futbolçu üçün isə klubun büdcəsindən ümumilikdə 56,8 milyon avro çıxdı. Elə bu göstərici də Türkiyə futbolu üçün tamamilə yeni rekorddu. Təkcə Cengiz Ündər (15 milyon avro), Fred (9,75) və Şimanski (9,75) ''üçlü''sü üçün 34,5 milyon avro ödənildi. Beləliklə, ''Fənər'' bu yay 2 göstəricidə Türkiyə rekordunu yenilədi. ''Qalatasaray'' isə heyətinin dəyərinə (290 milyon avro) görə rekord qırmağa müvəffəq oldu.

ƏLİ