Karlos Vinisius və Serj Orye ilə birlikdə tarixindəki legionerlərin sayı 200-ə yüksələn “Qalatasaray” 201-ci əcnəbini də heyətə qatıb.

"Football-plus.az" xəbər verir ki, rəhbərlik Okan Burukun israrla gücləndirilməsini tələb etdiyi sol cinaha “Hannover-96”dan Derrik Könü transfer edib. 3,35 milyon avro qarşılığında heyətə cəlb olunan 25 yaşlı almaniyalı futbolçu ilə 2,5 illik müqavilə imzalanıb. Müqavilədə bonuslar da mövcuddu. Könə bu mövsümün sonuna qədər 300 min avro məvacib veriləcək. O, gələn mövsüm 450 min avro, 2025/26-da isə 500 min avro qazanacaq. “Bavariya”nın yetirməsi olan Kön münhenlilərin ikinci komandasında 3 mövsüm top qovsa da, əsas komandaya qədər yüksələ bilməyib. Daha sonra iki mövsüm “Villem II”də top qovan futbolçu 2022-dən bəri hannoverlilərin uğuru üçün tər tökürdü. Otən mövsüm 33 oyunda 5 qol, 6 məhsuldar ötürməlik performans sərgiləyən Kön karyerası ərzində 264 oyunda 15 qol, 35 ötürmə ilə fərqlənib.