Okan Burukun rəhbərliyi altında yeni mövsümə hazırlığı davam etdirən və son yoxlama oyununda A seriyası təmsilçisi “Leççe”ni 2:1 məğlub edən “Qalatasaray”la bağlı transfer xəbərləri var.

Tetedən başlayaq. “Football-plus.az” xəbər verir ki, Braziliyalı vinger artıq “Cim-Bom”un futbolçusu deyil. Çərşənbə günü Avstriyada toplanışda olan “sarı-qırmızılar”ın düşərgəsini tərk edərək Yunanıstana yollanan 24 yaşlı futbolçu “Panatinaikos”a transfer olunub. “Sambaçı” yeni klubu ilə dördillik müqavilə imzalayıb. “Panatinaikos”da ona dərhal “10” nömərli forma verilib və onun adı avrokubokların iştirak ərizəsinə salınıb. “Qalatasaray” bu satışdan 4,75 milyon avro qazanacaq. Türkiyə çempionu Teteni ötən yay azad agent statusunda heyətinə qatmışdı. Futbolçu 45 rəsmi oyunda 3 qol, 6 məhsuldar ötürməlik performansla ümidləri doğrultmadı. Tetenin “Şaxtyor”la müqaviləni birtərəfli qaydada pozduğuna görə FİFA tərəfindən verilən 2,5 milyon avroluq cəzanı da futbolçu özü ödəyəcək.

Kazımcan Karataşın da yeni klubunun adına aydınlıq gəlib. Onunla “Sparta”nın maraqlandığı deyilsə də, gənc sol cinah müdafiəçisi Rusiyaya yollanıb. Premyer-liqada çıxış edən “Orenburq” onu birilliyə icarəyə götürüb. Rusiya mətbuatının yazdığına inansaq, “Qalatasaray” icarəhaqqından heç bir gəlir əldə etməyəcək. “Orenburq”, sadəcə, Kazımcanın illik məvacibini ödəyəcək ki, bu məbləğ də 7,5 milyon lirəyə bərabərdi. 2022-ci ildən “Qalatasaray”da olan Kazımcan ötən mövsümün ikinci dövrəsini icarə əsasında “Ankaragücü”də keçirmişdi. Karataş Əmircan Gürlükün ardından “Orenburq”un ikinci türkiyəli futbolçusuna çevrilib.

Yeni transferlərə gəlincə, “Qalatasaray” müdafiənin sağ cinahını gücləndirməyə müvəffəq olub. Quela Due ilə bağlı “Renn”lə anlaşma əldə etmək mümkün olmayınca İstanbul nəhəngi diqqətini “Kopenhagen”li Elias Yelertə yönəltdi. Rəhbərlik qısa müddət ərzində bu transferi tamamlamağı bacardı. 21 yaşlı danimarkalı futbolçu ilə beşillik müqavilə imzalanıb. Klubdan verilən açıqlamada qeyd olunub ki, Yelertə ilbəil uyğun olaraq 900 min avro, 1 milyon avro, 1,1 milyon avro, 1,2 milyon avro və 1,35 milyon avro ödəniləcək. Bu transfer “sarı-qırmızılar”a 9 milyon avroya başa gəlib. Bu məbləğ 3 il ərzində 6 hissəyə bölünərək ödəniləcək. Yelert artıq Avstriya toplanışına qatılaraq dünən komanda lə birlikdə ilk məşqə də çıxıb. İstedadlı futbolçu “24” nömrəli forma ilə çıxış edəcək. Yelert “Kopenhagen”in yetirməsidi və indiyə qədər heç bir başqa klubda oynamayıb. Ötən mövsüm “Qalatasaray”a qarşı Çempionlar Liqasında hər iki oyunda uğurlu performans sərgiləyərək Okan Burukun diqqətini cəlb edən gənc futbolçu ümumilikdə “Kopenhagen”də 97 rəsmi oyun keçirərək 1 qol, 6 məhsuldar ötürmə ilə fərqlənib.

“Qalatasaray” rəhbərliyi qəpik-quruşa transfer edilən və 30 milyon avroya satılan Saşa Boe kimi Yelertin də ulduzunu parladaraq onu yaxşı qiymətə Avropa nəhənglərindən birinə satmaq istəyir. “Qalatasaray” tarixinin 203-cü əcnəbi futbolçusu olan Yelert ehtiyac duyulduğu təqdirdə müdafiənin solunda da oynamağı bacarır. Bundan sonra rəhbərlik əsas diqqətini ikiyönlü oynamağı bacaran mərkəz yarımmüdafiəçisinə yönələcək. Buruk rəhbərlikdən məhz belə oyunçunun transferini tələb edib.