''Beşiktaş''ın gənc ulduzunun yığmada debütü təxirə salındı
Yoldaşlıq oyunu çərçivəsində Macarıstan və Avstriya ilə qarşılaşacaq Türkiyə yığmasının heyəti ilə bağlı yeni xəbər var.
Məlum olduğu kimi Vinçentso Montella bu dəfəki heyətə 4 debütant çağırmışdı. Amma onlardan ikisi - Semih Kılıçsoy ilə Ahmetcan Kaplan Türkiyə yığmasının düşərgəsini tərk edib. Onlar Budapeştə aparılmayıb. Hər iki gənc futbolçu Türkiyənin U-21 yığmasının heyətinə qoşulub. Qardaş ölkənin gənclər yığması bu gün yoldaşlıq oyununda Gürcüstanla qarşılaşacaqsa, martın 26-da AÇ-2025-in seçmə mərhələsi çərçivəsində səfərdə İtaliya ilə üz-üzə gələcək. Bu futbolçuların əsas komandadan gənclər yığmasına göndərilməsi birmənalı qarşılanmayıb. Xüsusilə də bu mövsüm Türkiyə çempionatının kəşfi sayılan, ''Beşiktaş''ın heyətində vurduğu qollarla diqqət çəkən 18 yaşlı forvard Semih Kılıçsoyun yığmada debütü səbirsizliklə gözlənilirdi. Ona görə də Montellanın bu addımı ''Beşiktaş'' cəbhəsində çox böyük narazılıq doğurub. Hətta klub tərəfindən bəyanat yayılıb və bu addım sərt şəkildə tənqid atəşinə tutulub. Montella özü isə bu hadisə ilə bağlı bunları deyib:
''Semih bizim sevdiyimiz futbolçudu. Amma yüksək səviyyədəki futbolda heç ilk ilini də tamamlamayıb. Gənclər yığması başqa ölkənin deyil. Onlar da bizim komandamızdı. Onların da qarşıda çox vacib oyunu var. Ona görə də bu cür qərar verdik. Gənc futbolçuların çox da stress yaşamadığı bir atmosfer yaratmalıyıq. ''Beşiktaş'' fanatları rahat olsun. Onların əllərində parlamaqda olan bir futbolçu yetişir. Mən heç vaxt formanın rənginə görə qərar vermirəm. Qərarı həmişə özüm verirəm. Bu baxımdan içləri rahat olsun''.
ƏLİ
Digər xəbərlər
