Fernandeş niyə ehtiyatda qaldı?

“Mançester Yunayted”in kapitanı Bruno Fernandeş “Bornmut”la oyunda əvvəldən axıra qədər ehtiyatda qalıb. Baş məşqçi Maykl Karrik portuqaliyalı yarımmüdafiəçini start heyətindən kənarda saxlamaq qərarına gəlib.

"Football-plus.az" xəbər verir ki, bu qərar futbolçunun Çempionlar Liqasında “Komo”ya 1:4 hesablı məğlubiyyətdən sonra baş məşqçinin taktikasını açıq şəkildə tənqid etməsinin ardınca verilib. Fernandeş həmin qarşılaşmadan sonra komandasının müdafiə olunmaq üsulundan narazılığını bildirib. O, rəqibə həddən artıq sərbəstlik verildiyini və daha cəsarətli oyun nümayiş etdirməyin vacibliyini vurğulayıb: “Bəzən təzyiq altında daha cəsarətli olmalı, risk edərək yüksək pressinq tətbiq etməli və rəqibi çətin vəziyyətə salmalıyıq”.

Karrik isə tənqidlərə cavabında taktiki sistemdən asılı olmayaraq futbolçuların meydanda yetərincə mübarizə aparmalı olduqlarını vurğulayıb. Fernandeş cümə və şənbə günləri komanda ilə məşqlərdə iştirak edib. Buna görə onun ehtiyatda qalması zədə yox, məşqçinin qərarı ilə əlaqələndirilir.
Portuqaliyalı ulduz cari mövsümdə ilk dəfə premyer-liqa matçında start heyətindən kənarda qalıb.