Türkiyə yığmasının AÇ-2024-ün final mərhələsinə hazırlıq çərçivəsində keçirəcəyi yoxlama matçlarındakı rəqiblər bəlli olub.

"Football-plus.az" xəbər verir ki, “ay-ulduzlular” bütün oyunları səfərdə keçirməyə üstünlük verib. Qardaş ölkənin komandası martda iki qarşılaşmaya çıxacaq. Türkiyə martın 22-də Budapeştdə yerləşən “Puşkaş Arena”da Macarıstanın, martın 26-da isə Vyanada yerləşən “Ernst Happel”də Avstriyanın qonağı olacaq. İtaliyalı mütəxəssis Vinçentso Montellanın çalışdırdığı komanda iyunun 4-də Bolonyada İtaliya yığması ilə qarşılaşacaq. Həm Macarıstan, həm Avstriya, həm də İtaliya AÇ-2024-ün iştirakçısıdı. Türkiyə ilə İtaliya, məlum olduğu kimi, AÇ-2032-yə də birlikdə evsahibliyi edəcək. Maraqlıdı ki, Türkiyə bu komandaların heç biri ilə şəxsi oyunlarda müsbət statistikaya malik deyil. Qardaş ölkə buna qədər həm Macarıstan, həm də Avstriya ilə 16 dəfə üz-üzə gəlib. Macarlara qarşı oyunlarda 4 qələbə, 2 heç-heçə, 10 məğlubiyyət, avstriyalılara qarşı oyunlarda 7 qələbə, 1 heç-heçə, 8 məğlubiyyət qeydə alınıb. Türkiyə ilə Macarıstanın yolu sonuncə dəfə 2020/21-də Millətlər Liqasının qrup mərhələsində kəsişib. O vaxt Macarıstan hər iki görüşdə qol buraxmadan qalib gəlmişdi! Avstriya ilə Türkiyə sonuncu dəfə 2016-nın martında məhz elə “Ernst Happel”də yoldaşlıq oyununda qarşılaşıb. Həmin görüşdə türklər 2:1 üstün olmuşdu. İtaliyanı isə Türkiyə tarixi ərzində heç vaxt məğlub edə bilməyib! Tərəflər indiyə qədər 9-u rəsmi, 6-sı özəl olmaqla 15 matçda üz-üzə gəlib. Bunların 11-i italyanların qələbəsi, 4-ü isə bərabərliklıə yekunlaşıb. Bu iki komanda sonuncu dəfə 2022-nin martında qarşılaşıb. Konyada keçirilən həmin yoldaşlıq matçında İtaliya qalib gəlib - 3:2.