Türkiyə yığmasının baş məşqçisi Vinçentso Montella qarşıdakı yoxlama oyunları üçün siyahını açıqlayıb.

"Football-plus.az" xəbər verir ki, qardaş ölkənin komandası AÇ-2024-ün final mərhələsinə hazırlıq çərçivəsində martın 22-də Budapeştdə Macarıstan, martın 26-da isə Vyanada Avstriya ilə üz-üzə gələcək. Hər iki görüş Bakı vaxtı ilə saat 23.45-də başlayacaq.

İtaliyalı mütəxəssisin açıqladığı heyətə gəlincə, gözlənildiyi kimi, burda bir neçə yeni simaya rast gəlmək mümkündü. İlk növbədə yaxınlarda “ay-ulduzlular”a üstünlük verdiyini açıqlayan “Nürnberq”in gənc qürbətçi futbolçusu Can Uzunun və bu mövsüm “Beşiktaş”ın heyətində parlaq oyun nümayiş etdirən gənc forvard Semih Kılıçsoyun ilk dəfə yığmaya dəvət aldığını vurğulamağa dəyər.

Bundan başqa, “Ayaks”da 2-ci mövsümünü keçirməsinə baxmayaraq, əsas komandada yeni-yeni oynamağa başlayan “Trabzonspor”un yetirməsi olan 21 yaşlı mərkəz müdafiəçisi Ahmetcan Kaplan da ilk dəfə yığmaya çağrılıb. Abdulkadir Bardakcı, Çağlar Söyüncü və Altay Bayındır zədə üzündən heyətə düşə bilməyibsə, “Real”da, nəhayət, qol hesabını açan Arda Gülər uzun fasilədən sonra ilk dəfə yığmaya çağrılıb. Əslində “Samsunspor”un təcrübəli qapıçısı Okan Kocuku da yığmanın debütantı saymaq olar. Düzdü, 28 yaşlı qapıçı 2018-in mayında, o dönəm Türkiyəni çalışdıran Mirça Luçesku tərəfindən yığmaya dəvət edilmişdi. Amma həmin vaxt Okanın adı ailəvi səbəblər üzündən siyahıdan çıxarılmışdı.

Sonda 29 nəfərlik geniş siyahını təqdim edirik:

qapıçılar – Mərt Günok (Beşiktaş), Uğurcan Çakır (Trabzonspor), Muhammed Şengezer (İstanbul BŞ), Okan Kocuk (Samsunspor);

müdafiəçilər – Mərt Müldür, Fərdi Kadıoğlu (hər ikisi “Fənərbaxça”), Zəki Çəlik (Roma), Ahmetcan Kaplan (Ayaks), Merih Dəmiral (Əl-Əhli), Ozan Kabak (Hoffenhaym), Samet Akaydın (Panatinaikos), Cenk Özkacar (Valensiya);

yarımmüdafiəçilər – Hakan Çalhanoğlu (İnter), Orkun Kökçü (Benfika), Salih Özcan (Borussiya D), İsmayıl Yüksək, Cengiz Ündər, İrfan Can Kahveci (hamısı “Fənərbaxça”), Kaan Ayhan, Kərəm Aktürkoğlu (hər ikisi “Qalatasaray”), Yunus Akgün (Lester), Abdülkadir Ömür (Hall Siti), Arda Gülər (Real), Can Uzun (Nürnberq), Yusuf Yazıcı (Lill);

hücumçular – Semih Kılıçsoy, Barış Alpər Yılmaz (Qalatasaray), Enes Ünal (Bornmut), Kənan Yıldız (Yuventus).