Karyerasını Səudiyyə Ərəbistanında davam etdirən Kriştiano Ronaldonan son dönəmlərdə ya qol xəbəri gəlir, ya da onun qeyri-etik hərəkətlərə yol verməsi xəbərlərini eşidirik.

"Football-plus.az" xəbər verir ki, ''Əl-Nəsr''in portuqaliyalı superulduzu bazar günü daxili çempionatın 21-ci turunda çərçivəsində ''Əl-Şabab''la səfər oyununda yenə hər iki cəhətdən diqqət çəkdi. Komandasının 3:2 hesabı ilə qalib gəldiyi görüşdə Kriştiano əvvəlcə dəqiq penalti zərbəsi ilə hesabı açdı. Final fitindən sonra isə o, yerli fanatların ''Messi, Messi'' təzahüratına əvvəlcə əlini qulağına qoymaqla, sonra da bir az oturaraq əlini ayağının arasına aparmaqla və qəribə bir hərəkətə yol verməklə cavab verdi. Bundan başqa Ronaldo həmin oyunda Talişkanın qələbə qolundan sonra da tribunalara qeyri-etik jest etdi. 39 yaşlı futbolçunun son hərəkətlərinə görə başı ağrıya bilər. Belə ki, Səudiyyə Ərəbistanı Futbol Federasiyasının İntizam və Etika Komitələri artıq bu hərəkətlə bağlı araşdırmaya başlayıblar. Yerli mənbələrin yazdığına görə idmançıya yaraşmayan hərəkətlərə yol verdiyinə görə Kriştianoya 2 oyunluq cəza verilə bilər. Ötən il də ''Əl-Hilal''a qarşı matçdan sonra Ronaldo stadionu tərk edərkən Messinin lehinə təzahürat eşidən kimi əlini cinsi orqanına tərəf aparmışdı. Fevralın əvvəllərində isə ''Əl-Hilal''a qarşı hazırlıq oyununda Ronaldo hər dəfə topu qəbul edərkən ''Messi'' təzahüratını eşitməkdən bezərək əli ilə ''burda Messi yox, mənəm'' işarəsini nümayiş etdirmişdi. Qeyd edək ki, Səudiyyə Ərəbistanı çempionatında bombardirlər yarışına başçılıq edən Ronaldo bu mövsüm 20 oyuna 22 dəfə fərqlənib. Ümumilikdə isə ''Əl-Nəsr''in heyətində o, indiyə qədər 54 rəsmi oyunda 48 qol, 13 məhsuldar ötürməlik performans sərgiləyib.

ƏLİ