Kriştiano Ronaldo nəhayət, Səudiyyə Ərəbistanında qolsuz və uğursuz seriyaya son qoydu.

"Football-plus.az" xəbər verir ki, onun şərəfini qoruduğu ''Əl-Nəssr'' dünən 24-cü tur çərçivəsində öz meydanında ''Əl-Rayed''i 4 cavabsız qolla darmadağın etdi.

Portuqaliyalı superulduz artıq 4-cü dəqiqədə hesabı açaraq qələbənin əsasını qoydu. Bu, onun Səudiyyə Ərəbistanı çempionatında keçirdiyi 12-ci oyunda vurduğu 12-ci qol oldu.

Qeyd edək ki, son 3 qarşılaşmada həm Ronaldo, həm də ''Əl-Nəssr'' qola həsrət qalmışdı. Ər-Riyad təmsilçisi bu matçlarda ''Əl-Hilal'' (0:2) və ''Əl-Vahda''ya (0:1) uduzmuş, ''Əl-Feyha'' ilə qolsuz bərabərliyə qalmışdı.

Bundan başqa Kriştianonun ''Əl-Hilal''a qarşı prinsipial matçda onu ''Messi Messi'' təzahüratları ilə qıcıqlandırmağa çalışan fanatlara cavab olaraq əlini cinsi orqanına tərəf yönəltməsi futbolsevərlər tərəfindən birmənalı qarşılanmamış və müzakirələrə səbəb olmuşdu. Hətta onun ölkədən qovulmasını tələb edənlər də var idi. Sona 6 tur qalmış ''Əl-Nəssr''in taleyi öz əlində deyil. Komanda 25 oyuna topladığı 56 xalla 2-ci pillədə qərarlaşıb. Bir oyun az keçirən lider ''Əl-Ittihad''ın isə 59 xalı var.

ƏLİ