Messi “böyük beşlik” ölkələri komandalarının heyətində bütün turnirlərdə qol sayını 697 həddinə çatdırmaqla Kriştiano Ronaldonun daha bir rekordunu yenilədi.

Argentinalı “Barselona”nın heyətində 672, PSJ-nin heyətində isə 25 qol vurub. O, 697-ci qolu 835-ci oyunda vurdu. Ronaldo isə top-liqa klublarının heyətində 696 dəfə fərqlənib: “Mançester Yunayted”də 145, “Real”da 450 və “Yuventus”da 101 qol. Portuqaliyalı 919 oyun keçirib. Kriştiano “Sportinq”in heyətində də 5 qol vurub, ancaq Portuqaliya “böyük beşliy”ə aid olmadığından, bu qollar statistikada nəzərə alınmır.