“Mançester Yunayted”dən qalmaqallı şəkildə ayrılaraq “Əl-Nəssr”ə yollanan və futbol dünyasında Səudiyyə Ərəbistanı çempionatına marağı birəbeş artıran Kriştiano Ronaldo ilə bağlı yeni xəbərlər var.

"Football-plus.az" xəbər verir ki, 2,5 ilə 500 milyon avroluq astronomik bir sözləşməyə imza atan portuqaliyalı ulduz, buna baxmayaraq, Səudiyyə Ərəbistanında xoşbəxt deyil. Hər halda, son xəbərlər məhz belə düşünməyə əsas verir. Şayiələrə inansaq, ailəsi ilə birlikdə 5 ay ərzində bu qapalı mədəniyyətə sahib olan ölkəyə heç cür uyğunlaşa bilməyən Ronaldo mövsümün sonunda ayrılmaq barədə ciddi şəkildə düşünür. Ümumiyyətlə, onun “Əl-Nəssr”də işlərinin yağ kimi getdiyini söyləmək çətindi. Düzdü, portuqaliyalının məhsuldarlığı qaydasındadı. Hər halda, 15 oyuna 12 qol pis göstərici sayılmamalıdı. Amma “Əl-Nəssr”in ünlü futbholçunun transferindən sonra daxili turnirlərdəki bütün kubokları silib-süpürəcəyi, eləcə də asanlıqla çempion olacağı ilə bağlı proqnozlar doğrulmayıb. Ər-Riyad şəhərinin təmsilçisi əvvəlcə yanvarda superkubok uğrunda matçda “Əl-İttihad”a boyun əydi (1:3). Aprelin 19-da “Əl-Hilal”la prinsipial oyundakı (0:2) məğlubiyyət liderliyin əldən çıxması ilə nəticələndi. Bundan 5 gün sonra isə “Əl-Nəssr” Kral kubokunun yarımfinalında öz meydanında “Əl-Veyhda”ya minimal hesabla uduzaraq mübarizəni dayandırdı. Yəni Ronaldo heyətdə ola-ola, artıq iki titul əldən çıxıb. Çempionatda isə liderlə arada 3 xallıq fərq var. Bütün bunlar azmış kimi, “Əl-Hilal”la qarşılaşmada Ronaldonun onu “Messi, Messi” şüarları ilə cırnadan fanatlara əlini cinsi orqanına qoyaraq cavab verməsi böyük söz-söhbətə səbəb olmuşdu. Yerli vəkillərdən biri bu hərəkətə görə Kriştianonun ölkədən qovulması üçün hər şey edəcəyini bildirmişdi. İngilislərin iddiasına görə Ronaldo sabiq klubu “Real”a qayıdaraq və burda bir mövsüm top qovaraq karyerasını başa vurmaq arzusundadı. Amma digər tərəfdən İspaniyanın “El Nacional” nəşrinin iddiasına görə, Ronaldonun Madridə futbolçu kimi qayıtması artıq mümkün deyil. Nəşr iddia edir ki, Florentino Peres sabiq oyunçusuna qucaq açmağa hazırdı. Amma yalnız klubun səfiri qismində! Bütün bu şayiələrin fonunda Kriştiano dünən “instaqram”da hovuz kənarında olan bir şəklini paylaşdı. Onun başındakı papaqda “Əl-Nəssr”in embleminin olması gözdən qaçmadı.