Mövsümün ilk “Böyük dəbilqə” seriyalı turnirində mübarizə başa çatmaqdadı.

“Football-plus.az” xəbər verir ki, cümə axşamı qadınların, dünən isə kişilərin turnirində finalçılar müəyyənləşdi. Bu turnirin ötənilki qalibi Arina Sobolenko Kori Qauffu məğlub edərək yenə finala çıxdı. Sonuncu dəfə finallarla bağlı belə seriyaya Serena Uilyams malik olub. Amerikalı 2015-ci və 2017-ci illərdə titulu qazanıb, 2016-cı ildə isə finalda Anjelik Kerberə uduzub. Belaruslu tennisçi həlledici oyunda Çjen Sinvenlə qarşılaşacaq.

21 yaşlı çinli xanım yarımfinalda Dayana Yastremskayanın öhdəsindən gəldi. Karyerasında ilk dəfə “Böyük dəbilqə” turnirində final oynayacaq Çjen Sinvenin indiyəqədərki ən yaxşı nəticəsi 2023-ün “US Open”ində 1/4 finala vəsiqə idi. O, həmin mərhələdə məhz Sobolenkoya uduzmuşdu.

Dünən kişilərin turnirində də yarımfinalçılar müəyyənləşdi. İlk 1/4 final oyununda “Australian Open”in onqat qalibi Novak Cokoviç gözlənilmədən Yannik Sinnerə uduzdu. Serbiyalı ulduz karyerasında ilk dəfə bu turnirin yarımfinalında məğlubiyyətlə barışdı, həmçinin bu turnirdəki 33 oyunluq qələbə seriyası qırıldı. İtaliyalı Sinner isə 2008-ci ildən bəri ən gənc (22 yaş 163 gün) finalçı kimi “Australian Open”in tarixinə düşdü. Həmin vaxt məhz Cokoviç ən gənc finalçı olmuşdu.

Turnirin son finalçısı Daniil Medvedev – Aleksandr Zverev görüşündə müəyyənləşdi. 5 setlik mübarizədən qalib ayrılan rusiyalı tennisçi son 4 ildə 3-cü dəfə bu turnirin finalında oynayacaq. Daniil 2021-də Novak Cokoviçə, 2022-də isə Rafael Nadala uduzub.

yarımfinal
Kişilər
Sinner (İtaliya, 4) - Cokoviç (Serbiya, 1) 6:1, 6:2, 6:7 (6:8), 6:3
Medvedev (Rusiya, 3) - Zverev (Almaniya, 6) 5:7, 3:6, 7:6 (7:4), 7:6 (7:5), 6:3
Qadınlar
Sobolenko (Belarus, 2) - Qauff (ABŞ, 4) 7:6 (7:2), 6:4
Çjen Sinven (Çin, 12) - Yastremskaya (Ukrayna) 6:4, 6:4