“Australian Open”in az qala hər mərhələsindən sonra Novak Cokoviçin şəninə difiramblar oxumağa məcburuq.

"Football-plus.az" xəbər verir ki, sadəcə, ona görə ki, serb ulduz qələbədən doymur. 36 yaşlı Cokoviç srağagün 1/4 finalda Teylor Fritsi məğlub etməklə ATP turirlərində hard örtükdə 700-cü qələbəsini qazandı və Rocer Federerdən (783) sonra bu həddə çatan 2-ci tennisçi oldu. O, həmçinin “Australian Open”də ardıcıl 33-cü qələbəsini qazanmaqla bu göstəricidə Monika Seleşə çatdı.

Statistikası ilə heyrətləndirən daha bir tennisçi var, ancaq pis mənada. Söhbət 1/4 finalda Yannik Sinnerə uduzan Andrey Rublevdən gedir. Rusiyalı tennisçi karyerası ərzində 10-cu dəfə “Böyük dəbilqə” turnirlərində 1/4 final mərhələsini adlaya bilmədi. Nə qədər inanılmaz statistika olsa da, rəqəmlər yalan danışmır. Andrey indiyə qədər üç dəfə “Australian Open”də (2021, 2023, 2024), dörd dəfə “US Open”də (2017, 2020, 2022, 2023), iki dəfə “Rolan Qarros”da (2020, 2022), bir dəfə isə “Uimbldon”da (2023) yarımfinalın astanasında dayanıb.

1/4 final
Kişilər
Cokoviç (Serbiya, 1) – Frits (ABŞ, 12) 7:6 (7:3), 4:6, 6:2, 6:3
Sinner (İtaliya, 4) - Rublev (Rusiya, 5) 6:4, 7:6 (7:5), 6:3
Medvedev (Rusiya, 3) - Hurkaç (Polşa, 9) 7:6 (7:4), 2:6, 6:3, 5:7, 6:4
Zverev (Almaniya, 6) – Alkaras (İspaniya, 2) 6:1, 6:3, 6:7 (2:7), 6:4
Qadınlar
Sobolenko (Belarus, 2) - Kreyçikova (Çexiya, 9) 6:2, 6:3
Qauff (ABŞ, 4) - Kostyuk (Ukrayna) 7:6 (8:6), 6:7 (3:7), 6:2
Yastremskaya (Ukrayna) - Noskova (Çexiya) 6:3, 6:4
Çjen Sinven (Çin, 12) - Kalinskaya (Rusiya) 6:7 (4:7), 6:3, 6:1