Avstraliya Açıq Tennis Çempionatı sona yaxınlaşmaqdadı.

Srağagün və dünən keçirilən oyunlardan sonra yarımfinalçılar müəyyənləşdi. Kişilər arasında yarımfinal cütləri belədi: Stefanos Sisipas – Karen Xaçanov, Novak Cokoviç – Tommi Pol. Qadınlar arasında yarımfinal cütlərinə gəlincə, Yelena Rıbakina Viktoriya Azarenko ilə, Maqda Linett isə Arina Sobolenko ilə qarşılaşacaq.

1/4 final oyunlarında ən ciddi mübarizə Polla Şelton arasında getdi. Tommi həmvətənini məğlub etməklə karyerasında ilk dəfə “Böyük dəbilqə” turnirinin yarımfinalına vəsiqə qazandı.

Rublev Cokoviçə müqavimət göstərə bilmədi. “Böyük dəbilqə” turnirlərinin 21 qat qalibi olan serb “Australian Open”də qələbə seriyasını 26 oyuna çatdırmaqla 2004-04 aralığında heç kimə uduzmayan Andre Aqassinin rekordunu təkrarladı. Cokoviç 2011-14 aralığında da bu turnirdə 25 qələbəlik seriya yaxalamış, 26-cı oyunda Sten Vavrinkaya uduzmuşdu.

Cokoviçin yarımfinalda və finalda da uduzmayacağını düşünənlər çoxdu. İş ondadı ki, o, əvvəllər 9 dəfə Avstraliyada finala qədər irəliləyib və hamısında da qələbə qazanıb. Ümumiyyətlə, “Böyük dəbilqə” turnirlərində 44-cü dəfə yarımfinalda oynayacaq Novak bu göstəricidə yalnız isveçrəli Rocer Federerə (46) uduzur. Serbin 1/4 finalda məğlub etdiyi Rublevlə bağlı da maraqlı məqam var. 25 yaşlı rusiyalı indiyə qədər 7 dəfə “Böyük dəbilqə”nin 1/4 finalında oynayıb və hər dəfə də uduzub. 2021 və 2023-də “Australian Open”də, 2020 və 2022-də “Rolan Qarros”da, 2017, 2020 və 2022-də isə “US Open”də bu mərhələyə qədər irəliləyib.