“Napoli”nin İtaliya çempionatında zəif çıxışı rəhbərliyi təcili tədbirlər görməyə vadar edir. Artıq klubda üç transfer əməliyyatı reallaşıb.

İtaliyanın son çempionu “Bornmut”un yarımmüdafiəçisi Hamed Traoreni heyətinə qatıb. Klubun rəsmi saytının xəbərində 23 yaşlı futbolçunun mövsümün sonuna qədər icarəyə götürüldüyü bildirilib. “Napoli” Hamedi 25 milyon avroya birdəfəlik almaq hüququna malik olacaq. Traore bu mövsüm ümumilikdə 6 oyuna çıxıb və 1 qol vurub. Afrikalı futbolçunun İngiltərə klubu ilə müqaviləsinin müddəti 2028-ci il iyunun sonuna qədərdi.

“Napoli”ni bir futbolçu tərk edib. Alessandro Zanoli İtaliyanın digər klubuna icarəyə verilib. 23 yaşlı müdafiəçi karyerasını “Salernatina”da davam etdirəcək. Onunla müddəti mövsümün sonunadək nəzərdə tutulan müqavilə imzalanıb. Alessandro bu mövsüm “Napoli”nin heyətində 6 matça çıxıb.

Rəhbərliyin praktiki olaraq reallaşdırdığı digər transfer əməliyyatı Matteo Politano ilə bağlıdı. Sağ cinah yarımmüdafiəçisi ilə müqavilə yenilənmək üzrədi. Artıq tərəflər bu mövzuda ilkin razılığa gəliblər. Bu barədə insayder Fabritsio Romano məlumat yayıb. Müqavilənin müddəti tezliklə 3 illiyə uzadılacaq. 30 yaşlı futbolçunun əvvəlki sözləşməsinin müddəti 2025-ci ilin yayına qədər idi. Politano ilə klubun prezidenti Aurelio De Laurentis şəxsən görüşüb və tərəflər əməkdaşlığın davam etdirilməsini vacib sayıblar. İtaliyalı vinger cari mövsümdə bütün turnirlərdə 26 oyuna çıxıb, 7 qol vurub və 5 məhsuldar ötürmə verib.