“Tottenhem”də iki gün ərzində 4 transfer əməliyyatı reallaşıb. İngiltərə klubunu iki oyunçu tərk edib, iki futbolçu isə Londona gəlib.

"Football-plus.az" xəbər verir ki, Timo Verner klubunu növbəti dəfə dəyişib. O, İngiltərənin paytaxtına qayıdıb. “Tottenhem” hücumçunu “Leyptsiq”dən mövsümün sonuna kimi icarəyə götürüb. İngiltərə klubunun saytının məlumatına görə, “Tottenhem”in yayda Almaniya millisinin oyunçusunu 18 milyon avroya birdəfəlik transfer etmək hüququ var. Yeni klubunda “16” nömrəli formanı geyəcək 27 yaşlı futbolçu bu mövsüm bütün turnirlərdə 14 matçda iştirak edib, 2 qol vurub və 1 məhsuldar ötürmə verib. Vernerin 2020-22-ci illərdə Londonun digər klubunda – “Çelsi”də oynadığını da xatırladaq.

“Tottenhem” heyətinə Rade Drequşini də cəlb edib. London klubunun rəsmi saytı “Cenoa”nın müdafiəçisinə görə 25 milyon avro ödənildiyini xəbər verib. Rumıniyalı futbolçu ilə bağlanan müqavilənin müddəti 2030-cu ilin yayına qədər nəzərdə tutulub. Xatırladaq ki, “Cenoa” Radeni ötən yay “Yuventus”dan 5,5 milyon avroya almışdı. O, daha əvvəl genuyalıların heyətində icarə əsasında çıxış etmişdi. Drequşin “Cenoa”da keçirdiyi 62 oyunda 6 qolun və 1 məhsuldar ötürmənin müəllifi olub.

Bu keçidin əvəzində Ced Spens “Tottenhem”dən İtaliya klubuna yollanıb. Genuyalılar onu mövsümün sonuna qədər icarəyə götürüblər. “Cenoa”nın 23 yaşlı ingilis müdafiəçini yayda birdəfəlik almaq hüququ olacaq. “Tottenhem”də yalnız 6 oyun keçirən, icarə statusu ilə “Renn” və “Lids”də oynayan Cedin transferi 8 milyon avro dəyərləndirilir.

Londondan ayrılan ikinci oyunçu isə Erik Dayerdi. İngilis müdafiəçi Almaniyaya yollanıb. 29 yaşlı futbolçu “Bavariya” ilə yarımillik müqavilə imzalayıb.