Hər iki komanda uğursuzluq zolağındadı. "Zirə" son iki, “Araz-Naxçıvan” isə 4 turda qələbəyə həsrət qalmışdı. Qəsəbə təmsilçisi ötən tur "Neftçi"yə səfərində minimal hesabla məğlub olmuşdu. “Qarabağ”ın bir gün əvvəl keçirilən oyunda “Sumqayıt”ı darmadağın etməklə xal fərqini 7-yə çatdırması da “Zirə” üzərində əlavə psixoloji gərginlik yaratmışdı. Tərəflərin meydanda sona qədər çarpışacağı aydın idi.

Komandalar oyuna ehtiyatlı başladı. İlk hücum cəhdi "qartallar"dan gəldi. Rüstəm topu təkbaşına rəqibini cərimə meydançasına daşıyaraq zərbə endirsə də, qapıçı yerindəydi. Naxçıvanlılar buna dərhal cavab verdi. Orxanın qüvvətli olmayan baş zərbəsi dirəkdən qayıtdı. Bir qədər sonra Abdullanın cərimə meydançasına asmasını Orxan tamamlasa da, Tyaqo topu tutdu. 16-cı dəqiqədə Turan müdafiəçilərin başını gicəlləndirib qapını yoxlasa da, qolkiper qola “yox” dedi. Növbəti epizodda Tyaqo Kadirinin də sevinməsinə imkan vermədi. Rodriges qapıçıyla təkbətək çıxsa da, "əlcək sahibi" onu qabaqladı. "Zirə"dən Rəhimin cəhdi də uğursuz oldu. Ribeyronun hücumunda top qapının üstündən keçdi. İlk yarını qonaqlar üstün keçirsələr də, hesab açılmadı. Fasilədən sonra qəsəbə təmsilçisi oyuna fəal qoşuldu. İsmayılın zərbəsi hədəfə düşmədi. Qonaqlardan Rodriges topu qapı üstündən vurdu. İsmayılın növbəti cəhdindən də nəticə hasil olmadı. İrəliləyən dəqiqələrdə tərəflər qarşılıqlı qol axtarışında oldu. Maşikenin zərbəsi bərbad alındı. Zeblinin sevinməsinə qolkiper imkan vermədi. Turanın cərimə zərbəsini Tyaqo dəf etdi. 79-ci dəqiqədə Eldarın qapı önünə asmasından sonra müdafiəçi Abdulla Rüstəmin topa təmas etməsinin qarşısını alarkən avtoqol müəllifi oldu. Amma referi qolu təsdiqləmədi. Epizod üç dəqiqə VAR-dan incələnəndən sonra ofsayd qeydə alındı. Oyuna əlavə olunan dəqiqələrdə Melonun uzaq məsafədən cərimə zərbəsini Tyaqo kornerə çıxardı. Oyunda başqa qol epizodu olmadı. Rəşad Əhmədovun final fiti qolsuz heç-heçəni rəsmləşdirdi. Çox güman, bu nəticədən nə Rəşad Sadıqov razı qaldı, nə də Azər Bağırov.

Gözdən qaçmadı
* Oyun izləməyə "Araz-Naxçıvan"ın sabiq mətbuat katibi Tahir Tahiroviç və 120-yə yaxın qonaq azarkeş də gəlmişdi
* Oyunu izləyənlər arasında AFFA prezidenti Rövnəq Abdullayev və FİFA-ın baş katibi Fatma Samaouro da var idi
* Futbolçulara meydana irqçiliyi pisləyən "No to racism" plakatı ilə çıxmışdı.
* 79-cu dəqiqədə Abdulla Rzayevin avtoqolu sayəsində meydan sahibləri hesabı açarkən "Zirə"nin mətbuat katibi Elmar Abdullazadə çılğıncasına sevindi. Bir qədər sonra qolun ofsaytdan vurulduğu aydınlaşandan sonra "qartallar"ın sözçüsü məyus oldu.
* Stadionda ilk dəfə səyyar “fəstfud” satışı həyata keçirildi.