"Qartallar" ardıcıl 4 oyunda qələbə qazanandan sonra "Qəbələ"dən məğlubiyyətlə dönsə də, yeni bir seriayaya başlamağın əleyhinə deyildi.

Lider meydana 3 xal üçün çıxmışdı. "Kimyaçılar" da son turda doğma meydanda yaxşı oyun sərgiləməsinə rəğmən, "Neftçi"yə eyni hesabla yenilmişdi, odu ki, Zirə səfərindən uğurla nəticəylə qayıtmaq istəyirdi.

Hakimin start fitindən sonra meydan sahibləri oyuna fəal qoşuldu. Kulaç iki dəfə qapını yoxladı. Birində zərbəsi qeyri-dəqiq alındı, digərində isə qapıçı topu tutdu. 10-cu dəqidədə insident yaşandı. Zebli Rövlana qarşı kobud oynadığından hakim ona birbaşa “qırmızı” göstərdi. Amma epizodu incələmək üçün VAR-a baxmadı, elə orda əyləşənlərdən də siqnal gəlmədi. Bu da yerli azarkeşlərin kəskin etirazına səbəb oldu. Bundan sonra oyun əsasən meydanın mərkəzində getdi.

Qonaqlardan ilk həmlə 35-ci dəqiqədə gəldi. Bədəlovun qapı önünə asmasına Rövlan yüksəlib zərbə endirsə də, qapıçı iki cəhddə topu tutdu. Xaçayevin uzaqdan zərbəsi isə qapıdan aralı keçdi. Hissənin sonlarına yaxın "Zirə" tempi artırdı. 45+1-ci dəqiqədə Qismətin cərimə meydançasına ötürməsini Məqsəd qarşısıalınmaz gözəl zərbəylə qola çevirdi.

"Qartallar"fasiləyə üstün yollandı. 2-ci yarıya qonaqlar fəal başladı. Rövlan iki dəfə qapını yoxlasa da, hədəfə düşə bilmədi. Oyun "kimyaçılar"ın üstünlüyü şəraitində keçsə də, onlar qol vəziyyətləri yarada bilmirdi. Meydan sahibləri isə bütün diqqətini müdafiəyə ayırmışdı. 87-ci dəqiqədə Mantekanın qapı önünə asmasına  Sorqa ayaq qoysa da, Tyaqo yerindəydi. Növbəti epizodda Kehat iki dəfə həmlə etsə də, qolkiper əla seyvlə yadda qaldı. Oyuna əlavə olunan sonuncu dəqiqədə Cibrila rəqibdən topu “oğurlayaraq” Akanı gördü, o isə reyd etdikdən sonra Rüstəmi tapdı. Sonuncu dəqiq zərbəylə Cənnətovu məyus etdi. Amma referi VAR-a baxandan sonra qolu ləğv etdi. Səbəb Cibrilanın topu ələ keçirərkən əllə oynaması idi.

Final fiti "Zirə"nin qələbəsini rəsmləşdirdi. Bu komanda artırılan vaxtı da nəzərə alsaq, faktiki 90 dəqiqə azlıqda oynadı. Bəlkə gələn dəfə Rəşad Sadıqov meydana 11 yox, 10 futbolçu buraxsın?!

Gözdən qaçmadı 
* Sumqayıtdan 50-60 azarkeş komandaya dəstək vermək üçün gəlmişdi.
* Yerli azarleşlərin olduğu tribunanın qarşısında "Zirə"nin loqosu və qartal təsvir olunan, həmçinin üzərində "biz sənə inanırıq" yazılan baner asılmışdı.
* Oyunun protokolda səhvə rast gəldik. Belə ki, "kimyaçılar"ın heyətində həm Abu Dosso, həm də Murad Ağamalıyev "12 nömrə" kimi göstərilmişdi. 
* Oyundan öncə "Zirə" prezidenti Taleh Nəsibov komandada 100 oyun keçirən Qismət Alıyevlə Dmitrios Çantakiasa üzərində 100 yazılan forma hədiyyə etdi. 
* Məqsəd İsayev əvəzlənərkən tribunadan onun adını səsləndirərək alqışladılar.

ABDULLA İSMAYILOĞLU